ضلع کرم کا امن سبوتاژ کرنے کی کوشش کامیاب نہیں ہوگی،علامہ ساجد نقوی

کراچی(اسٹاف رپورٹر)قائد ملت جعفریہ پاکستان علامہ سید ساجد علی نقوی نے کہا ہے کہ ضلع کرم کے امن کو سبوتاژ کرنے کی کوشش کامیاب نہیں ہوگی ، افسوس سے کہنا پڑتا ہے کہ بعض عناصر ضلع کرم میں امن کو برداشت نہیں کرسکتے، مقامی جرگہ پہل کرنیوالے ملزمان کی نشاندہی کرے تاکہ انہیں کیفر و کردار تک پہنچایا جائے ، عوام کے جان ومال کی حفاظت حکومت کی اولین ذمہ داری ہے زخمیوں کو طبّی و مالی امداد فراہم کرتے ہوئے نقصانات کا ازالہ کیا جائے ،انہوں نے شہید افراد کے خاندانوں سے دلی تعزیت و ہمدردی اور زخمیوں کی جلد صحت یابی کیلئے دعا کی ، علامہ ساجد نقوی نے کہا کہ صورتحال کا جائزہ لیا جائے اور حقائق کی روشنی میں علاقے کے امن کو برقرار رکھنے کیلئے اقدامات کئے جائیں۔