فرمان الہی
نماز کے اوقات
اسلام آباد (ممتازعلوی )تحریک انصاف کے سیکریٹری اطلاعات شیخ وقاص اکرم نے میڈیا کوریج اور عوامی توجہ حاصل کرنے کیلئے بانی پی ٹی آئی عمران خان کو ہدف تنقید بنانے والوں کو نوازشریف اور آصف زرداری کا درباری اورسیاسی مداری قرار دیدیا۔
وزیردفاع خواجہ آصف اور چیئرمین پیپلز پارٹی بلاول بھٹو کے بیانات پر ردعمل دیتے ہوئے شیخ وقاص اکرم کا کہناتھاکہ یہ سیاسی مداری اندرون خانہ اس بات کو تسلیم کرتے ہیں کہ عمران خان ہی پاکستان کی واحد سیاسی حقیقت ہے جس نے ملکی ترقی کیلئے اپنے سکون وآرام کی قربانی دی۔
شیخ وقاص اکرم نے اس بات پر زور دیاکہ عمران خان عالمی سطح کے رہنماء ہیںجبکہ ان کے نقاد محض اپنے آقاؤں کےپیادے ہیں جن کا کام بلاجواز تنقید کرناہے کیوں کہ شریف اور زرداری جیسے کرپٹ اور پرانے سیاسی خاندانوں کا سیاسی خاتمہ قریب ہے ۔انہوں نے الزام عائد کیاکہ اقتدار کے لالچی افراد کا یہ اتحاد ملکی مفادات کیلئے نہیں بلکہ عمران خان کو سیاسی منظر نامے سے باہر کرنے کیلئے ہے تاہم ان کا یہ مذموم منصوبہ الٹا پڑگیا اور وہ بانی پی ٹی آئی کو سائیڈ لائن کرنے میں ناکام ہوگئے۔
شیخ وقاص اکرم نے بلاول بھٹو کو ناراض سیاسی بچہ قرار دیتے ہوئے مشورہ دیاکہ وہ عمران خان جیسے عالمی رہنماءکی بجائے اپنی سطح کے سیاسی لیڈران کے ساتھ بحث پر توجہ مرکوز رکھیں ۔شیخ وقاص نے افسوس کا اظہار کرتے ہوئے کہا کہ بدقسمتی سے زرداری کی تاریخ رہی ہے کہ وہ اپنے سیاسی طور پر ناپختہ نوجوان بیٹے کومسلم لیگ (ن) پر دباؤ ڈالنے کے لئے استعمال کرتے ہیں تاکہ شریفوں کو نشانہ بنا کر مذاکرات میں فائدہ اٹھایا جاسکے۔
انہوں نے ریمارکس دیئے کہ عمران خان نے زرداری اور شریف کے برعکس کبھی بھی سودے بازی کیلئے غیر ملکی مداخلت پر انحصار نہیں کیا جنہوں نے ملک کو تباہی کی حالت میں چھوڑا اور جیلوں سے بچنے اور باہر باہر نکلنے کیلئے مذاکرات کئے۔
انہوں نے خواجہ آصف کو انتہائی مضحکہ خیز سیاست دان قرار دیا، جن کے سلطان محمود غزنوی کے بارے میں تبصروں نے پاکستان کو بین الاقوامی سطح پر مسلسل شرمندہ کیا ہے حالانکہ وہ وزیر دفاع اور وزیر خارجہ جیسے اہم عہدوں پر فائز رہ چکے ہیں۔
انہوں نے خواجہ آصف کو مخاطب کرتے ہوئے کہا کہ آپ اور آپ کے ساتھی برسوں سے یہ دعویٰ کر رہے ہیں کہ عمران خان فوج کاپراجیکٹ ہے۔
