فرمان الہی
نماز کے اوقات
اسلام آباد(تنویر ہاشمی، کامرس رپورٹر)وفاقی حکومت کی جانب سے ’’اڑان پاکستان‘‘کے عملی نفاذ اور اہداف کے حصول کیلئے صوبائی حکومتوں اور متعلقہ اسٹیک ہولڈرز کے ساتھ باضابطہ مشاورت کا آغاز کیا جا رہا ہے۔ اس سلسلے کی پہلی مشاورتی ورکشاپ آج پیر کو کراچی میں منعقد ہوگی جس میں وفاقی وزیر برائے منصوبہ بندی احسن اقبال، وزیراعلیٰ سندھ سید مراد علی شاہ اور صوبائی وزیر خزانہ و منصوبہ بندی سید ناصر حسین شاہ خطاب کرینگے ،اجلاس میں مختلف شعبوں سے تعلق رکھنے والے سٹیک ہولڈرز شرکت کریں گے جن میں ہائیر ایجوکیشن کمیشن کے چیئرمین ڈاکٹر مختار احمد، پاکستان انسٹیٹیوٹ آف ڈویلپمنٹ اکنامکس کے وائس چانسلر ڈاکٹر ندیم جاوید، صوبائی وزراء، متعلقہ محکموں کے سیکریٹریز، صنعت و تجارت کے نمائندے، میڈیا اور چیمبر آف کامرس اینڈ انڈسٹریز کے عہدیداران شامل ہیں۔اجلاس کے دوران مختلف ورکنگ گروپس تشکیل دئیے جائیں گے جن میں سٹیک ہولڈرز اہداف کے حصول اور وفاقی و صوبائی حکومت کے درمیان مؤثر کوآرڈینیشن کو یقینی بنانے کیلئے اپنی آراء پیش کرنے اور ’’اڑان پاکستان‘‘کے اہداف کے حصول پر تجاویز پر تبادلہ خیال کرینگے،ورکنگ گروپس کی سفارشات اجلاس کے اختتام پر شرکاء کے سامنے پیش کی جائیں گی جس کے بعد ایک مشترکہ اعلامیہ جاری کیا جائے گا۔مشاورتی ورکشاپ کے بعد وزیر منصوبہ بندی احسن اقبال اور وزیراعلیٰ سندھ سید مراد علی شاہ مشترکہ پریس کانفرنس کرینگے جس میں ورکشاپ کی سفارشات، صوبے کی ترقی میں ’’اڑان پاکستان‘‘کے کردار اور مستقبل کی حکمت عملی پر روشنی ڈالی جائے گی۔
