فرمان الہی
نماز کے اوقات
کراچی ( سہیل افضل )سندھ کابینہ میں خواتین کیلئے ایک ہزار پنک الیکٹرک موٹر سائیکلوں کی خریداری کا فیصلہ، ڈاؤ میڈیکل یونیورسٹی کے زیر انتظام ڈاؤ سائنس فاؤنڈیشن قائم کرنے، میہڑ پولی ٹیکنیکل انسٹیٹیوٹ زیبسٹ کے حوالے کرنے، کراچی کے لئے ڈبل ڈیکر بسیں خریدنے ، اینٹی نارکوٹکس کے ریکارڈ کو آٹومیٹڈ کرنے ، کراچی واٹر اینڈ سیوریج منصوبے کے لئے دھابیجی تک ٹرانسمیشن لائن بچھانے ، ڈبل کیبن گاڑیوں کی رجسٹریشن ایک ہی کیٹیگری میں کرنے اور کے فور منصوبہ کیلئے کلری بگھار فیڈر اور کینجھر جھیل کی توسیع کا منصوبہ کی لاگت پر نظرثانی کر کے منظوری دے دی ہے، وفاقی حکومت کی جانب سے حکومت سندھ کو آئی ایم ایف کیساتھ ڈیل کی پاسداری کرنے کی ہدایت ، کابینہ میں گندم کی پیداوار میں 20فیصد کمی کے خدشات کا اظہار کیا گیا۔ سینئر صوبائی وزیر شرجیل انعام میمن نے کہا کہ وزیر اعلیٰ پنجاب کا اشتہار 90فیصد مستقبل کے پروگرامز پر مبنی ہے ، منشیات سے زومبیز پیدا ہورہے ہیں۔ تفصیلات کے مطابق جمعرات کو وزیراعلیٰ سندھ سید مراد علی شاہ کی زیر صدارت کابینہ کےاجلاس میں کئی اہم فیصلےکئے گئے۔کابینہ اجلاس جمعرات کو وزیر اعلیٰ ہاؤس میں منعقد ہوا جس میں صوبائی وزراء، مشیران، خصوصی معاونین، چیف سیکریٹری اور متعلقہ سیکریٹریز نے شرکت کیسندھ کابینہ کے اجلاس کے بعد سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے پریس بریفنگ میں بتایا کہ ، اجلاس میں ڈاؤ میڈیکل یونیورسٹی کے زیر انتظام ’ڈاؤ سائنس فاؤنڈیشن‘ قائم کرنے کی منظوری دی گئی، جس کے تحت اب ڈاؤ سائنس فاؤنڈیشن کمپنی سانپ اور پاگل کتوں کے کاٹنے کی ویکسینز ، ادویات اور دیگر چیزیں بنائے گی۔ انہوں نے کہا کہ کابینہ اجلاس میں میہڑ پولی ٹیکنیکل انسٹیٹیوٹ زیبسٹ کے تحت چلانے کی منظوری دے دی ہے، جس سے مقامی نوجوانوں کو روزگار اور ہنر سیکھنے کے لئے مواقع میسر آئیں گے، سندھ کابینہ نے سندھ کے لوگوں کے لئے مزید بسیں خرید نے کا فیصلہ کیا ہے، ڈبل ڈیکر بسیں خرید کرنے کی منظوری دی گئی۔ کابینہ اجلاس میں کے فور منصوبہ کے لیئے کلری بگھار فیڈر اور کینجھر جھیل کی توسیع کا منصوبہ کی لاگت پر نظرثانی کر کے منظوری دی گئی۔
