فرمان الہی
نماز کے اوقات
لاہور(نمائندہ جنگ)وزیراعظم محمد شہباز شریف نے رمضان المبارک میں مہنگائی پر برہمی کا اظہار کرتے ہوئے کہا ہے کہ چینی اور دیگر اشیائے ضروریہ کی قیمتوں کے کنٹرول کے حوالے سے کوئی کوتاہی برداشت نہیں کی جائیگی، عوام کو کھانے پینے کی اشیاء کی کم نرخوں پر فراہمی ہماری اولین ترجیح ہے،وفاقی اور صوبائی حکومتیں ملکر عام آدمی کو کھانے پینے کی سستی اشیاء کی فراہمی یقینی بنائیں، وزیراعظم نے چینی کی ذخیرہ اندوزی میں ملوث عناصر کیخلاف سخت کارروائی کرنے کی ہدایت کرتے ہوئے کہا ہے کہ گزشتہ مہینوں میں حکومت نے سخت کارروائی کی جس سے چینی کی اسمگلنگ کے خاتمہ میں مدد ملی، وزیراعظم کو بریفنگ میں بتایا گیا کہ چینی کی اسمگلنگ مکمل ختم کرنے کیلئے بھرپور اقدامات لئے جائینگے اور اسمگلرز کیخلاف سخت کاروائی کی جائیگی، علاو ہ ازیں وزیر اعظم سے وفاقی وزیر اویس لغاری، چیئرمین یوتھ پروگرام رانا مشہود کی ملاقات کی اس موقع پر ملکی و سیاسی صورتحال پر تبادلہ خیال کیا گیا۔ تفصیلات کے مطابق وزیراعظم شہباز شریف کی زیر صدارت ملک میں چینی کی سپلائی اور قیمت کے کنٹرول کے حوالے سے اجلاس ہوا ۔اجلاس میں نائب وزیراعظم و وزیر خارجہ اسحاق ڈار ، وفاقی وزیر منصوبہ بندی احسن اقبال ، وفاقی وزیر اقتصادی امور احد خان چیمہ ، وفاقی وزیر صنعت و پیداوار و قومی غذائی تحفظ رانا تنویر حسین ، وفاقی وزیر علی پرویز ملک اور متعلقہ اعلی سرکاری افسران نے شرکت کی۔ چاروں صوبوں کے چیف سیکرٹریز بذریعہ وڈیو لنک اجلاس میں شریک ہوئے اوراجلاس کو بریفنگ دی ۔وزیر اعظم شہباز شریف نے کہا کہ عوام کو اشیائے خور و نوش کی ارزاں نرخوں پر فراہمی حکومت کی اولین ترجیح ہے،گزشتہ مہینوں میں حکومت نے چینی کی اسمگلنگ پر سخت کارروائی کی جس سے چینی کی اسمگلنگ کے خاتمے میں مدد ملی ،وزیراعظم نے چینی کی قیمتوں پر کنٹرول کے حوالے سے سخت اقدامات اٹھانے کی ہدایت کرتے ہوئے چینی کی ذخیرہ اندوزی میں ملوث عناصر کی خلاف سخت کارروائی عمل میں لائی جائے۔ وزیراعظم شہباز شریف نے کہا کہ وفاقی اور صوبائی حکومتیں مل کر عام آدمی کو سستے داموں اشیائے خور و نوش کی فراہمی یقینی بنائیں ۔رمضان المبارک میں چینی اور دیگر اشیائے ضروریہ کی قیمتوں کے کنٹرول کے حوالے سے کوئی کوتاہی برداشت نہیں کی جائے گی ۔اجلاس کو چینی کی پیداوار کے حوالے سے بریفنگ دیتے ہوئے بتایا گیا کہ اس وقت ملک میں چینی کا وافر اسٹاک موجود ہے ،صوبائی سطح پر چینی کی ارزاں نرخوں پر فروخت کے لئے فئیر پرائس شاپس قائم کی گئی ہیں ،چینی کی اسمگلنگ مکمل ختم کرنے کے لئے بھرپور اقدامات لئے جائیں گے اور اسمگلرز کے خلاف سخت کارروائی کی جائے گی ۔قبل ازیں وزیراعظم شہباز شریف سے وفاقی وزیر پاور ڈویژن سردار اویس احمد لغاری ، چیئرمین وزیر اعظم یوتھ پروگرام رانا مشہود احمد خان ،سابق اور موجودہ اراکین اسمبلی نے لاہور میں ملاقات کی جس میں ملکی مجموعی و سیاسی صورتحال پر تبادلہ خیال کیاگیا۔وفاقی وزیر سردار اویس لغاری نے وزیر اعظم شہباز شریف سے پاور ڈویژن سے متعلق امور پر بات چیت کی ۔چیئرمین وزیر اعظم یوتھ پروگرام رانا مشہود احمد خان نے وزیر اعظم شہباز شریف کو نوجوانوں کو بااختیار بنانے کے لیے ملک میں جاری منصوبوں کی پیشرفت کے حوالے سے تفصیلی بریفنگ دی ۔وزیر اعظم شہباز شریف سے سابق اراکین اسمبلی شیخ وسیم ،محمد عرفان ڈاہا اور اراکین قومی اسمبلی سعد وسیم اور محمد خان ڈاہا نے بھی ملاقات کر کے سیاسی صورتحال اور حلقوں کے حوالے سے تفصیلی تبادلہ خیال کیا۔
