فرمان الہی
نماز کے اوقات
لاہور (اے پی پی) وزیراعظم محمد شہباز شریف نے کہا ہے کہ تین لاکھ نوجوانوں کو آن لائن تربیت فراہم کی جائیگی، حکومت نوجوانوں کو جدید مہارتوں سے لیس کرنے کیلئے ہر ممکن تعاون فراہم کر رہی ہے، ہواوے کے آئی سی ٹی ٹریننگ پروگرام سے آئی ٹی برآمدات میں اضافے سمیت نوجوانوں کو روزگار کے حصول میں مدد ملے گی۔ ان خیالات کا اظہار انہوں نے اپنی زیر صدارت ہواوے ٹیکنالوجیز کے ساتھ پاکستان کے تین لاکھ نوجوانوں کو آئی سی ٹی ٹریننگ کی فراہمی کے حوالے سے جائزہ اجلاس میں کیا۔اس موقع پر ہواوے ٹیکنالوجیز کے وفد نے وزیراعظم سے ملاقات کی، اجلاس میں نوجوانوں کو ڈیجیٹل مہارتوں سے آراستہ کرنے اور آئی ٹی کے شعبے میں عالمی معیار کی تربیت فراہم کرنے کیلئے مختلف اقدامات کا جائزہ لیاگیا۔ وزیراعظم آفس کے میڈیا ونگ سے جاری بیان کے مطابق اجلاس میں گزشتہ برس چین میں ہواوے ٹیکنالوجیز کے ساتھ طے کئے گئے معاہدوں پر عمل درآمد کا جائزہ لیا گیا۔ اس موقع پر گفتگو کرتے ہوئے وزیراعظم نے کہا کہ ٹیکنالوجی کے فروغ اور ڈیجیٹل انقلاب میں نوجوانوں کا کلیدی کردار ہے۔ ہواوے ٹیکنالوجیز کے نمائندوں نے پاکستان میں جدید تربیتی پروگرام کیلئے اپنے عزم کا اظہار کیا۔ ہواوے ٹیکنالوجیز اس اقدام کے تحت نوجوانوں کو مصنوعی ذہانت (اے آئی)، سائبر سیکورٹی، کلائوڈ کمپیوٹنگ اور دیگر جدید ٹیکنالوجیز میں تربیت فراہم کریگی۔وزیراعظم کو بتایا گیا کہ 3لاکھ پاکستانی نوجوانوں کو آن لائن تربیت فراہم کی جائیگی۔اس مقصد کے لئے آئی سی ٹی ٹریننگ پورٹل کا باقاعدہ افتتاح وزیراعظم محمد شہباز شریف کرینگے۔ ہواوے ٹیکنالوجیز کی جانب سے اس وقت تک 20 ہزار 315 طلبہ کو تربیت فراہم کی جا چکی ہے۔ پروگرام کے تحت اسٹوڈنٹس، ٹرینرز اور آئی سی ٹی ٹیکنالوجیز میں کام کرنے والوں کی اپ اسکلنگ کی جا رہی ہے۔ ہواوے ٹیکنالوجیز جن ماسٹر ٹریننرز کو تربیت فراہم کریگا وہ مقامی سطح پر نوجوانوں کو تربیت فراہم کرینگے۔ وزیراعظم کی آئی ٹی ٹریننگ کے منصوبوں پر تیزی سے عمل درآمد یقینی بنانے کی ہدایت کی۔ وزیراعظم نے آئی سی ٹی ٹریننگ پورٹل کو زیادہ سے زیادہ لوگوں تک پہنچانے کی بھی ہدایت کی ہے۔وزیراعظم نے تمام صوبوں بشمول آزاد کشمیر و گلگت بلتستان تک اس منصوبے کو وسعت دینے کی ہدایت کی۔اجلاس میں وفاقی وزیر اطلاعات و نشریات عطاء اللہ تارڑ ، وفاقی وزیر انفارمیشن ٹیکنالوجی و ٹیلی کام شزا فاطمہ ، وزیراعظم کے معاون خصوصی ہارون اختر ، چیئرمین پی ایم یوتھ پروگرام رانا مشہود احمد خان اور متعلقہ اعلیٰ سرکاری افسران نے شرکت کی۔
