• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ایران، روس اور چین فوجی مشقیں کل سے شروع ہوں گی

آج کا اخبار
اہم خبریں
10 مارچ ، 2025
تہران (اے ایف پی) ایرانی میڈیا نے اتوار کے روز اطلاع دی کہ ایران، روس اور چین کی بحری افواج تعاون کو فروغ دینے کیلئے رواں ہفتے ایران کے ساحل پر فوجی مشقیں کریں گی،تینوں ممالک کی جنگی جہازوں کیساتھ ساتھ پاسدارن انقلاب کے جہاز بھی شریک ہونگے، آذربائیجان، جنوبی افریقا، عمان، قازقستان، پاکستان ، قطر ،عراق ، متحدہ عرب امارات اور سرلنکن مبصرین بھی شامل۔ ایرانی خبر رساں ادارے تسنیم نے مشقوں کے دورانیے کی وضاحت کیے بغیر کہا ہے کہ یہ "منگل کو چابہار بندرگاہ پر شروع ہوں گی" جو خلیج عمان میں جنوب مشرقی ایران میں واقع ہے۔ تسنیم کے مطابق "چینی اور روسی بحری افواج کے جنگی جہاز اور دیگر معاون بحری جہازوں کے ساتھ ساتھ ایرانی بحریہ کی فوج اور ایرانی فوج کی نظریاتی شاخ پاسدارانِ انقلاب کے جنگی جہازوں کی شرکت متوقع ہے۔" تسنیم نے بتایا، مشقیں "شمالی بحرِ ہند میں" ہوں گی اور ان کا مقصد "خطے میں سلامتی کو مضبوط بنانا اور شریک ممالک کے درمیان کثیر الجہتی تعاون کو فروغ دینا ہے۔" آذربائیجان، جنوبی افریقا، عمان، قازقستان، پاکستان قطر، عراق، متحدہ عرب امارات اور سری لنکا بطور مبصرین شرکت کرینگے۔ چینی وزارتِ دفاع نے وی چیٹ سوشل میڈیا نیٹ ورک پر کہا، چین "ایک ڈسٹرائر اور سپلائی جہاز تعینات کرے گا۔" ایرانی فوج نے فروری میں اسی علاقے میں "کسی بھی خطرے کے خلاف دفاعی صلاحیتوں کو مضبوط بنانے" کے لیے مشقیں کی تھیں۔ امریکی تسلط کا مقابلہ کرنے کے مشترکہ خواہش مند تینوں ممالک حالیہ برسوں میں خطے میں اسی طرح کی مشقیں کر چکے ہیں۔
اہم خبریں سے مزید