• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ملکی سالمیت اور استحکام کے لیے متحدہ ہونا انتہا پسندی و نفرت سے بچنا ہوگا، وزیراعظم

آج کا اخبار
اہم خبریں
31 مارچ ، 2025
اسلام آ باد (نمائندہ جنگ) وزیراعظم شہباز شریف نے کہا ہے کہ آج پاکستان کو اندرونی اور بیرونی دشمنوں سے خطرات لاحق ہیں،ہمیں ہر قسم کی انتہا پسندی، نفرت اور فرقہ واریت سے بچنا ہوگا، ملک کی سالمیت اور استحکام کے لیے ہمیں متحد ہونا ہوگا اور کسی بھی سازش کو کامیاب نہیں ہونے دینا، معیشت، معاشرت اور قومی یکجہتی کو مستحکم کرنا ہم سب کی مشترکہ ذمہ داری ہے، حکومت ملک کی اقتصادی بحالی، امن و امان کے قیام اور سماجی استحکام کیلئےبھرپور کوششیں کر رہی ہے، ہمیں چاہیے کہ متحد ہو کر اپنے ملک کو ترقی اور خوشحالی کی راہ پر گامزن کریں،رمضان المبارک میں تقویٰ، صبر اور قربانی کی جو تربیت ہمیں ملی، ہمیں چاہیے کہ اسے اپنی زندگیوں میں رمضان کے بعد بھی جاری رکھیں اور اسلامی اصولوں پر کاربند رہیں۔ وزیرِاعظم نے ان خیالات کا اظہار عید الفطر 1446ھ کے موقع پر قوم کے نام اپنے پیغام میں کیا۔ وزیر اعظم نے کہا کہ عید الفطر کے بابرکت موقع پر میں پوری قوم کو دل کی گہرائیوں سے عیدالفطر کی مبارکباد پیش کرتا ہوں، انہوں نے کہا کہ پاکستان دہشتگردوں کے خلاف ایک جنگ سے گزر رہا ہے اور ہماری پاک فوج کے افسران اور جوان اس ملک میں امن و امان کی بحالی کے لیے اپنی جانوں کا نذرانہ پیش کررہے ہیں، آج کے دن ہم اُن تمام شہدا کی بلندی درجات کیلئے دعاگو ہیں اور اُن کے خاندانوں کے ساتھ اظہارِ یکجہتی کرتے ہیں، آج کے دن ہم جعفر ایکسپریس کے سانحے کے شہیدوں کے لئے بھی دعاگو ہیں کہ اللہ ان کے درجات بلند فرمائے اور ان کے پسماندگان کے غم برابر کے شریک ہیں، ہمیں اپنے ان مظلوم بھائیوں کو بھی یاد رکھنا چاہیے جو ظلم و بربریت کا شکار ہیں، خاص طور پر فلسطین اور کشمیر کے مظلوم عوام جو آزادی کی جدوجہد میں مصروف ہیں، پاکستان ہمیشہ اُن کیساتھ کھڑا ہے اور رہے گا، عالمی برادری کو چاہیے کہ وہ انسانی حقوق کی خلاف ورزیوں کو روکے اور ان بے گناہ مسلمانوں کی داد رسی کرے،میں پاکستانی قوم سے اپیل کرتا ہوں کہ وہ عید کی خوشیوں میں اپنے کمزور اور ضرورت مند بہن بھائیوں رشتہ داروں اور پڑوسیوں کو شریک کریں، ان کی مدد کریں اور ایک فلاحی معاشرہ تشکیل دینے میں اپنا کردار ادا کریں۔
اہم خبریں سے مزید