• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ایران سے بجلی کی فراہمی معطل، مکران ڈویژن اندھیرے میں ڈوب گیا

آج کا اخبار
اہم خبریں
06 اپریل ، 2025
تربت (نامہ نگار) ایران سے بلوچستان کے مکران ڈویژن کو فراہم کی جانے والی بجلی کی فراہمی اچانک معطل ہو گئی، جس کے نتیجے میں پورا ڈویژن تاریکی میں ڈوب گیا، بجلی کی معطلی سے مند، تُمپ، تُربت، ہوشاب، پنجگور، جیوانی، گوادر ڈیپ سی پورٹ، نیو گوادر انٹرنیشنل ایئرپورٹ متاثر۔ کوئٹہ الیکٹرک سپلائی کمپنی (کیسکو) کے ترجمان کے مطابق 132کلو وولٹ کی دو ٹرانسمیشن لائنز، جو پیشن مند اور پولان جیوانی کے راستے ایران سے بجلی فراہم کرتی ہیں، ہفتے کی شب غیر متوقع طور پر بند ہو گئیں۔ بجلی کی معطلی سے مند، تُمپ، تُربت، ہوشاب، پنجگور، جیوانی، گوادر ڈور، گوادر ڈیپ سی پورٹ، نیو گوادر انٹرنیشنل ایئرپورٹ، پسنی اور اورماڑہ سمیت مکران کے تمام اہم گرڈ اسٹیشنز متاثر ہوئے ہیں، جس کے باعث علاقے میں مکمل طور پر بجلی کی فراہمی منقطع ہو گئی ہے۔ کیسکو حکام نے بتایا ہے کہ وہ ایرانی حکام کے ساتھ مسلسل رابطے میں ہیں اور جیسے ہی ایران سے بجلی کی فراہمی بحال ہو گی، مکران ڈویژن میں بجلی کی صورت حال معمول پر آ جائے گی۔ کیسکو نے ایران سے بجلی کی بندش پر مکران کے تمام صارفین سے دلی معذرت کرتے ہوئے ان سے صبر و تعاون کی اپیل کی ہے۔
اہم خبریں سے مزید