فرمان الہی
نماز کے اوقات
کراچی (اسٹاف رپورٹر) روہت شرما کے بعد بھارت کے عالمی شہرت یافتہ بیٹسمین ویرات کوہلی نے بھی ٹیسٹ کرکٹ سے ریٹائرمنٹ کا اعلان کردیا ۔اس طرح ایک عہد ختم ہوگیا۔ روہت شرما نے گزشتہ ہفتے کھیل کے طویل ترین فارمیٹ سے ریٹائرمنٹ کا حیران کن اعلان کیا تھا۔ ویرات کوہلی نے سماجی پلیٹ فارم ’انسٹاگرام‘ پر لکھا کہ پہلی بار بیگی بلیو پہنتے ہوئے 14 سال ہوچکے ہیں۔ سچ میں کبھی سوچا بھی نہیں تھا کہ یہ فارمیٹ مجھے کس سفر پر لے جائے گا، اس نے مجھے آزمایا، نکھارا اور وہ سبق سکھایا جو میں زندگی بھر یاد رکھوں گا۔ سفید لباس میں کھیلنا کچھ خاص ہوتا ہے۔ محنت، طویل دن، وہ چھوٹے لمحے جو کوئی نہیں دیکھتا، مگر جو ہمیشہ ساتھ رہتے ہیں، اس فارمیٹ سے رخصت ہو رہا ہوں، یہ آسان نہیں مگر ریٹائرمنٹ کا بہترین وقت لگتا ہے، میں نے جو کچھ بھی تھا، دیا ہے، اور اس نے مجھے اتنا کچھ واپس دیا ہے جتنا میں نے کبھی امید نہیں کی تھی۔ میں کھیل، ان لوگوں کیلئے جن کے ساتھ میدان میں وقت گزارا اور جس نے اس سفر میں میرا ساتھ دیا، دل میں شکر گزاری کے جذبات کے ساتھ اس فارمیٹ سے رخصت ہو رہا ہوں۔ میں ہمیشہ ٹیسٹ کرکٹ کیریئر کو مسکراہٹ کے ساتھ یاد کروں گا۔ ریٹائرمنٹ پر پاکستان کے سابق کپتان شاہد آفریدی نے کہا ہے کہ شاندار کیریئر پر ویرات کوہلی کو مبارکباد پیش کرتا ہوں، ٹیسٹ فارمیٹ آپ کی موجودگی اور مسابقتی جذبے سے محروم رہے گا۔دریں اثنا کوہلی کی ریٹائرمنٹ پر سابق اسٹار سچن ٹنڈولکر ، کپل دیو، بھارتی کرکٹ بورڈ، دنیا بھر کے اہم سابق اور موجودہ پلیئرز اور دنیا بھر میں ان کے پرستاروں نے زبردست خراج تحسین پیش کیا ہے۔
