فرمان الہی
نماز کے اوقات
انصار عباسی
اسلام آباد :…وزیر اعظم شہباز شریف اور چیف آف آرمی اسٹاف جنرل عاصم منیر پاکستان کی دو فاتح شخصیات بن کر ابھرے ہیں، جنہوں نے بھارت کیخلاف حالیہ جنگ کے دوران غیر معمولی اتحاد اور قائدانہ صلاحیتوں کا اظہار کیا۔ اس معاملے سے واقف ذرائع نے دی نیوز کے ساتھ بات چیت میں تصدیق کی ہے کہ وزیر اعظم اور آرمی چیف بحران کے دنوں میں مسلسل رابطے میں رہے اور ہر بڑے فیصلے کو پالیسی بنانے سے لے کر اس کے بروقت نفاذ تک دونوں میں ہم آہنگی رہی۔ فوجی، سفارتی اور سیاسی محاذوں پر دونوں کی پارٹنرشپ واضح نظر آئی۔ اقتدار کے ایوانوں میں جو کچھ ہو رہا تھا اس کے گواہ ایک اہم ذریعے نے بتایا کہ دونوں شخصیات کے درمیان ہم آہنگی اور اعتماد پر مبنی تعلقات تھے، دونوں نے باہمی افہام و تفہیم، ایک دوسرے کے کردار اور اپنے ذمہ طے شدہ ذمہ داریوں کا احترام کیا اور اتفاق رائے کے ساتھ آگے بڑھے، یہی وجہ تھی کہ پاکستان کیلئے نتائج شاندار رہے۔ ذریعے نے بتایا کہ ہم آہنگی کا عالم یہ تھا کہ ہمہ وقت (ہفتے کے 7؍ دن 24 گھنٹے) باہمی سطح پر معلومات کا تبادلہ ہو رہا تھا، جس سے ظاہر ہوتا ہے کہ دونوں شخصیات اور ان کی ٹیموں کے درمیان وسیع ترین مشاورت کا سلسلہ جاری تھا۔
