فرمان الہی
نماز کے اوقات
کراچی ( اسٹاف رپورٹر)سندھ حکومت نے لیاری میں عمارت گرنے کے سانحے پر سندھ بلڈنگ کنٹرول اتھارٹی(ایس بی سی اے)کے سربراہ کو معطل کرتے ہوئے لواحقین کے لیے فی کس 10 لاکھ روپے امداد کا اعلان کیا ہے ،صوبائی حکومت نے شہر میں انتہائی مخدوش قرار دے گئی 51 عمارتوں کو منہدم کرنے کا بھی فیصلہ کیا ہے، سندھ کے سینئر وزیر شرجیل انعام میمن نے وزیر بلدیات سعید غنی ، صوبائی وزیر مکیش کمار چاؤلہ اور وزیر داخلہ ضیا لنجار کے ہمراہ پریس کانفرنس کرتے ہوئے کہاکہ لیاری میں عمارت گرنے کے سانحے میں ملوث افرادکیخلاف سخت کارروائی کی جائیگی، فیکٹ فائنڈنگ کمیٹی کی رپورٹ اور سفارشات پر بے رحم آپریشن کیا جائے گا، صوبائی وزراء نے بتایا کہ وزیراعلی سندھ مراد علی شاہ نے ڈی جی ایس بی سی اے کو معطل کردیا ہے، وزیراعلی نے وزیر داخلہ کو فوری طور پر ایف آئی آر کاٹ کر ملوث افراد کے خلاف سخت سے سخت کارروائی کی ہدایت کی ہےسندھ کے سینئر وزیر شرجیل انعام میمن نے لیاری میں عمارت گرنے کے افسوسناک واقعے پر گہرے دکھ اور افسوس کا اظہار کرتے ہوئے کہا کہ پوری قوم، حکومت سندھ اور ہم سب اس سانحے پر غمزدہ ہیں۔ وزیر اعلیٰ سندھ کی زیر صدارت ہنگامی اجلاس ہوا جس میں واقعے کا نوٹس لیتے ہوئے فیصلہ کیا گیا کہ ذمہ دار افسران کے خلاف سخت کارروائی کی جائے گی۔ وزیر اعلیٰ نے فوری طور پر تحقیقاتی کمیٹی تشکیل دی ہے جو دو دن میں رپورٹ پیش کرے گی، وزیر بلدیات و محنت سعید غنی نے کہا کہ کمیٹی کی سربراہی کمشنر کراچی کریں گے اور انہیں شہر کی 51 انتہائی خستہ حال عمارتوں کو فوری طور پر گرانے کی ہدایت دی گئی ہے۔ مزید 588 مخدوش عمارتوں کی بھی جانچ پڑتال کمشنر کراچی کی نگرانی میں ہوگی تاکہ خطرناک عمارتوں کو بروقت خالی اور منہدم کیا جا سکے۔ سعید غنی نے کہا کہ لیاری کے متاثرہ خاندانوں کو فی کس 10 لاکھ روپے معاوضہ دیا جائے گا۔ انہوں نے مزید کہا کہ 2022 سے متاثرہ علاقے میں تعینات تمام افسران کو انکوائری میں شامل کیا جائے گا اور جس افسر کی لاپرواہی ثابت ہوئی اس کے خلاف مقدمہ درج ہوگا۔وزیر داخلہ ضیاء الحسن لنجار نے بھی واقعے کو “بہت بڑا المیہ” قرار دیتے ہوئے کہا کہ مجرمانہ غفلت کے مرتکب افراد کے خلاف کارروائی کی جائے گی اور انہیں گرفتار کیا جائے گا۔ ایک سوال کے جواب میں سینئر وزیر شرجیل انعام میمن نے کہا کہ کینٹونمنٹ بورڈز اور سندھ حکومت کے اپنے اپنے قوانین موجود ہیں، آج وزیر اعلی نے کہا جو بھی ملوث ہے اس کے خلاف سخت کارروائی کریں۔ ایک اور سوال کے جواب میں سینئر وزیر شرجیل انعام میمن نے کہا کہ کچی آبادیوں کو دیکھ رہے ہیں۔
