• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

بھارت عالمی سطح پر تنہائی کا شکار، پاکستان کی متحرک ثقافتی و سیاحتی سفارتکاری نمایاں

آج کا اخبار
اہم خبریں
11 جولائی ، 2025
اسلام آ باد (نمائندہ جنگ)چنگ ڈاؤ (چین) میں بھارت ایک بار پھر عالمی سطح پر سفارتی تنہائی کا شکار نظر آیا جبکہ پاکستان نے شنگھائی تعاون تنظیم (SCO) کے وزارتی اجلاس میں نہایت فعال، باوقار اور مربوط شرکت کے ذریعے دنیا کو اپنی خارجہ پالیسی کی نئی جہتوں سے روشناس کروایا۔پاکستان کی نمائندگی وزیر ثقافت و قومی ورثہ حذیفہ رحمان نے کی، جنہوں نے نہ صرف اجلاس سے پُرمغز، مدلل اور نکتہ رس خطاب کیا بلکہ عالمی رہنماؤں اور وزرائے ثقافت و سیاحت کے ساتھ مؤثر دو طرفہ ملاقاتوں کے ذریعے پاکستان کی ثقافتی سفارتکاری کو ایک نئی سمت دی۔اجلاس سے خطاب میں حذیفہ رحمان نے کہا کہپاکستان چین کے دل کے قریب ہے ، امن، ثقافت اور ترقی کا داعی ہے،چین میں وزیر حذیفہ رحمان کی موجودگی پاکستان کے اس نئے بیانیے کی غماز ہے جس میں ثقافت، سیاحت اور سافٹ پاور کو خارجہ پالیسی کا کلیدی ستون تسلیم کیا جا رہا ہے۔انھوں نے اپنے خطاب میں کہا کہ پاکستان شنگھائی تعاون تنظیم کے ساتھ ہر سطح پر اشتراک اور باہمی ترقی کے مواقع کو مزید وسعت دینے کے لیے پُرعزم ہے۔ چین محض ہمارا ہمسایہ نہیں بلکہ ہمارے دل کے قریب ترین شراکت دار ہے۔ ہم SCO کو ایک بااعتماد، پُرامن اور ترقی یافتہ پلیٹ فارم بنانے کے لیے تمام رکن ممالک کے ساتھ قدم سے قدم ملا کر آگے بڑھنا چاہتے ہیں۔”وزیر موصوف نے علاقائی روابط، مشترکہ ثقافتی ورثے کے تحفظ، باہمی سیاحت، اور تعلیمی و تخلیقی شعبہ جات میں اشتراک جیسے موضوعات پر جامع نکات پیش کیے، جنہیں اجلاس کے شرکاء نے غیر معمولی دلچسپی اور تحسین سے سنا۔ اُن کی گفتگو میں نہ صرف پاکستان کی قدیم تہذیبی وسعت کا عکس جھلکتا تھا بلکہ ایک مدبرانہ اور جدید سفارتکار کی فکری پختگی بھی واضح نظر آئی۔
اہم خبریں سے مزید