• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

غیرت کے نام پر قتل ماں باپ اور بچے کو بلوچستان میں دفن کرنے کی اجازت نہ ملی، کراچی میں تدفین

آج کا اخبار
اہم خبریں
01 اگست ، 2025
کراچی ( اسٹاف رپورٹر )گھگر پھاٹک پر گزشتہ روز غیرت کے نام پر قتل ہونے والے ماں باپ اور بچے کی تدفین کی اجازت بلوچستان میں نہ ملنے پر کراچی میں تدفین کر دی گئی۔ پولیس کے مطابق تینوں کی لاشوں کو بلوچستان لسبیلہ منتقل کیا گیا تھا تاہم رشتہ داروں کی جانب سے وہاں تدفین کی اجازت نہ ملنے پر تینوں کی میتوں کو واپس کراچی لایا گیا۔ ایس ایچ او تھانہ اسٹیل ٹاؤن اسلم نے بتایا کہ مقتولین کی نماز جنازہ ادا کرنے کے بعد مقامی قبرستان میں ان کی تدفین کر دی گئی ہے۔ انہوں نے بتایا کہ لاشوں کے ساتھ مقتول عبدلمجید کا بھائی اور کچھ خواتین بھی آئی تھیں۔ نماز جنازہ میں علاقہ مکین بھی شریک ہوئے۔ واضح رہے کہ گزشتہ روز غیرت کے نام پر کلہاڑیوں کے وار سے عبدالمجید، اس کی اہلیہ سکینہ اور 5سالہ بیٹے عبد النبی کو قتل کر دیا گیا تھا۔ مقتول عبدلمجید کے بھائی نوروز نے بتایا کہ مقتول بھائی اور اسکی بیوی نے پسند کی شادی کی تھی۔ شادی کے بعد دونوں خاندانوں میں اختلاف ہوگیا تھا۔ اختلاف ہونے کے دو سال بعد صلح بھی ہوگئی تھی لیکن اس کے باوجود انہیں قتل کردیا گیا۔ اس نے بتایا کہ بھائی اور بھابھی نے کورٹ میریج کی تھی۔ مقتول کے بھائی کا دعویٰ ہے کہ بھابھی کے بھائیوں نے بے دردی سے انھیں قتل کیا ہے۔ بھائی اور بھابی دونوں لسبیلہ بلوچستان کے رہائشی تھے۔
اہم خبریں سے مزید