فرمان الہی
نماز کے اوقات
راولپنڈی(نمائندہ جنگ /جنگ نیوز)آرمی چیف فیلڈ مارشل جنرل سید عاصم منیر نےکہاہے کہ پاکستان اور چین کی افواج حقیقی معنوں میں برادر فوجیں ہیں‘ ان کی پائیدار شراکت علاقائی استحکام کو فروغ دینے اور مشترکہ اسٹریٹجک مفادات کے تحفظ میں کلیدی کردار ادا کرتی رہے گی‘بدلتی ہوئی اسٹرٹیجک حرکیات کے باوجود دونوں ممالک کی دوستی مستحکم اور ناقابلِ شکست رہی ہےجو وقت کی ہر کسوٹی پر پوری اتری ہے اور بدلتے ہوئے چیلنجز کے باوجود باہمی تعلقات مضبوط ہیںجبکہ چینی سفیر جیانگ زائی ڈونگ کا کہنا ہے کہ دہشتگردی کے خلاف جنگ میں پاک فوج نے بے مثال کردار ادا کیا‘انہوں نے پاکستان کے ساتھ اپنی اسٹرٹیجک شراکت داری کے لیے چین کی غیر متزلزل حمایت اور عزم کا اعادہ کی۔جمعہ کو پاک فوج کے شعبہ تعلقات عامہ(آئی ایس پی آر)سے جاری بیان کے مطابق چین کی پیپلز لبریشن آرمی (پی ایل اے) کے قیام کی 98ویں سالگرہ جی ایچ کیو میں منائی گئی۔پاکستان چین کے سفیر جیانگ زائی ڈونگ اس موقع پر مہمان خصوصی تھے۔ تقریب میں ڈیفنس اتاشی میجر جنرل وانگ ژونگ ، چینی سفارتخانے کے حکام اور پاکستان کی تینوں مسلح افواج کے سینئر عسکری افسران نے بھی شرکت کی۔ فیلڈ مارشل سید عاصم منیر نے چینی مہمانوں کا پرتپاک استقبال کیا اور پی ایل اے کو اس کی 98ویں سالگرہ پر مبارکباد دی۔ آرمی چیف نے کہا کہ دونوں ممالک کے درمیان تعلقات منفرد‘سدا بہار اور بدلتے ہوئے علاقائی و عالمی چیلنجز کے باوجود غیرمعمولی طور پر مستحکم ہیں۔اپنے خطاب کے اختتام پر فیلڈ مارشل سید عاصم منیر نے کہا کہ پاکستانی فوج اور پی ایل اے سچے بھائیوں کی طرح ہیں۔ ان کی پائیدار شراکت علاقائی استحکام کو فروغ دینے اور مشترکہ سٹریٹجک مفادات کے تحفظ میں کلیدی کردار ادا کرتی رہے گی۔ تقریب سے خطاب کرتے ہوئے چینی سفیر نے پی ایل اے کی 98ویں سالگرہ منانے کے لئے تقریب کی میزبانی پر آرمی چیف کا مخلصانہ شکریہ ادا کیا۔ انہوں نے دہشت گردی کے خلاف جنگ میں پاکستانی مسلح افواج کے مستحکم کردار کو سراہا ۔
