فرمان الہی
نماز کے اوقات
اسلام آباد(اے پی پی)آرمی چیف فیلڈ مارشل سید عاصم منیر نے کہا ہے کہ پاک فوج بدلتے ہوئے جنگی ماحول میں فیصلہ کن برتری برقرار رکھے گی،قومی یکجہتی ، سول ملٹری ہم آہنگی ،ہائبرڈ خطرات کے مقابلے اور معاشرتی ہم آہنگی کے فروغ کیلئے قومی سطح کے اشتراک کی ضرورت ہے،جدید نظام کی شمولیت پاک فوج کے فضائی شعبہ کی جدیدیت کی جانب اہم سنگ میل ہے،پاک فوج کے شعبہ تعلقات عامہ (آئی ایس پی آر) کے مطابق سپہ سالار نے ملتان گیریژن کا دورہ کیا اور جدید Z-10ME اٹیک ہیلی کاپٹر کی پاک فوج میں شمولیت کی تقریب کی صدارت کی،چیف آف آرمی سٹاف نے مظفر گڑھ فیلڈ فائرنگ ریجنز میں نئے شامل کئے گئے Z-10MEہیلی کاپٹروں کی فائر پاور کا عملی مظاہرہ بھی دیکھا، آئی ایس پی آر کے مطابق یہ جدید ترین ہیلی کاپٹر رات اور دن میں درستگی سے حملے کی صلاحیت رکھتا ہے، جدید راڈار سسٹمز اور جدید ترین الیکٹرانک وار فیئر سے لیس یہ ہیلی کاپٹر پاک فوج کی فضائی اور زمینی خطرات سے نمٹنے کی صلاحیت کو نمایاں طور پر بڑھاتا ہے۔ تفصیلات کے مطابق ملتان گیریژن آمد پر کور کمانڈر ملتان نے فیلڈ مارشل سید عاصم منیر کا پرتپاک استقبال کیا۔آرمی چیف کوکور ہیڈکوارٹرز میں فارمیشن کی آپریشنل تیاریوں اور جاری تربیتی سرگرمیوں پر تفصیلی بریفنگ دی گئی، فیلڈ مارشل نے علمی و سماجی شخصیات سے ملاقات میں سول و ملٹری ہم آہنگی اور ہائبرڈ خطرات سے نمٹنے کے لئے مشترکہ کوششوں کی اہمیت پر زور دیا۔چیف آف آرمی سٹاف فیلڈ مارشل سید عاصم منیر نے قومی خودمختاری اور جغرافیائی سالمیت کے تحفظ کیلئے پاک فوج کے غیر متزلزل عزم کا اعادہ کرتے ہوئے کہا کہ قومی یکجہتی ، سول ملٹری ہم آہنگی اور ہائبرڈ خطرات کے مقابلے اور معاشرتی ہم آہنگی کے فروغ کیلئے قومی سطح کے اشتراک کی ضرورت ہے۔ بعد ازاں فیلڈ مارشل سید عاصم منیر نے ماہرین تعلیم اور سول سوسائٹی کے نمائندوں سے تعارفی نشست میں شرکت کی ۔ چیف آف آرمی سٹاف نے مظفر گڑھ فیلڈ فائرنگ ریجنز میں نئے شامل کئے گئے زیڈ ۔10 ایم ای ہیلی کاپٹروں کی فائر پاور کا عملی مظاہرہ بھی دیکھا، فیلڈ مارشل نے اس موقع پر کہا کہ اس جدید نظام کی شمولیت پاک فوج کے فضائی شعبہ کی جدیدیت کی جانب ایک اہم سنگ میل ہے جو میدان جنگ میں موثر رد عمل اور دشمن پر فیصلہ کن برتری قائم کرنے کی صلاحیت کو مزید مستحکم کرتا ہے۔ جوانوں سے گفتگو کرتے ہوئے آرمی چیف نے ان کے بلند حوصلے ، پیشہ وارانہ مہارت اور جنگی تیاریوں کو سراہا۔ انہوں نے مشترکہ عسکری حربی حکمت عملی کے کامیاب مظاہرے کو سراہتے ہوئے کہا کہ یہ پاک فوج کے اس عزم کی عکاسی کرتا ہے کہ وہ بدلتی ہوئی جنگی نوعیت میں فیصلہ کن برتری برقرار رکھنے کیلئے پرعزم ہے۔
