فرمان الہی
نماز کے اوقات
اسلام آباد (نیوز رپورٹر)چیف آف آرمی اسٹاف فیلڈ مارشل سید عاصم منیر نے کہا ہے کہ بھارت اب بھی خطے میں عدم استحکام پیدا کرنے پر بضد ہے، کسی بھی بھارتی جارحیت کا منہ توڑ جواب دیا جائیگا،دو طرفہ تصادم بہت بڑی غلطی ہوگی، پاکستان دہشت گردی کیخلاف آخری فصیل ہے، ڈیڑھ ماہ کے وقفے سے میرا دورہ واشنگٹن پاک امریکا تعلقات میں نئی جہت کی علامت ہے، کشمیر بھارت کا اندرونی معاملہ نہیں، نامکمل بین الاقوامی ایجنڈا ہے، بیرون ملک پاکستانی ’’برین ڈرین نہیں بلکہ برین گین‘‘ ہے، آج کا سوشل میڈیا ایک طاقتور ذریعہ بن چکا ہے، لیکن ملک دشمن عناصر اسے ’’ساختہ افراتفری‘‘ پیدا کرنے کیلئے بھی استعمال کرتے ہیں، امریکا کیساتھ ممکنہ تجارتی معاہدے کی بدولت بھاری سرمایہ کاری متوقع ہے، بین الاقوامی تعلقات کے محاذ پر بھی پاکستان نے نمایاں کامیابیاں حاصل کی ہیں، افغانستان سے فتنہ الخوارج سمیت کئی دہشتگرد تنظیمیں پاکستان کیخلاف متحرک ہیں، دہشت گردوں کو پوری قوت سے انصاف کا سامنا کرنا ہوگا، غزہ میں جاری نسل کشی، ایک بدترین انسانی المیہ ہے جسکے عالمی اور علاقائی دونوں سطح پر شدید مضمرات ہیں۔اتوار کو آئی ایس پی آر سے جاری بیان کے مطابق دورہ امریکا کے دوران آرمی چیف، فیلڈ مارشل سید عاصم منیر نے پاکستانی کمیونٹی سے خطاب کرتے ہوئے کہا کہ امریکا میں مقیم پاکستانیوں سے خطاب میرے لیے اعزاز کی بات ہے، بیرون ملک مقیم پاکستانی عزت و وقار کا سرچشمہ اور دیگر پاکستانیوں کی طرح پرجوش ہیں۔ انہوں نے کہاکہ بھارت اپنے آپ کو ’’وشوا گرو‘‘ کے طور پر پیش کرنا چاہتا ہے، لیکن عملی طور پر ایسا کچھ بھی نہیں، بھارت کی خفیہ ایجنسی ’’را ‘‘کی ٹرانس نیشنل دہشتگرد سرگرمیوں میں شمولیت عالمی سطح پر شدید تشویش کا باعث ہے، اسکی مثالیں کینیڈا میں سکھ رہنما کا قتل، قطر میں آٹھ بھارتی نیول افسران کا معاملہ، اور کلبھوشن یادیو جیسے واقعات ہیں۔ فیلڈ مارشل سید عاصم منیر نے کہا کہ پاکستان نے بھارت کی امتیازی اور دوغلی پالیسیوں کیخلاف کامیاب سفارتی جنگ لڑی ہے، بھارتی جارحیت نے خطے کو ایک خطرناک طور پر بھڑکنے والی جنگ کے دہانے پر لا کھڑا کیا، جہاں کسی بھی غلطی کی وجہ سے دو طرفہ تصادم بہت بڑی غلطی ہوگی۔انہوں نے کہاکہ پاکستان امریکی صدر ڈونلڈ ٹرمپ کا انتہائی مشکور ہے جنکی اسٹرٹیجک لیڈشپ کی بدولت نا صرف انڈیا پاکستان جنگ رکی بلکہ دنیا میں جاری بہت سی جنگوں کو روکا گیا ہے ،پاکستان نے اس اشتعال انگیزی کا پُرعزم اور بھرپور جواب دیا،ہم نے وسیع تر تنازع کو روکنے میں کامیابی حاصل کی۔ فیلڈ مارشل سید عاصم منیر نے کہا کہ ہماری ترقی اور خوشحالی دنیا بھر میں بسنے والے پاکستانیوں سے وابستہ ہے، اس وقت دہشت گردی کے کیخلاف پاکستان آخری فصیل ہے،دہشت گردوں کیلئے کوئی ہمدردی نہیں اور انہیں پوری قوت سے انصاف کا سامنا کرنا ہوگا۔ آرمی چیف نے کہا کہ بیرون ملک مقیم پاکستانیوں کی وطن عزیز کے ساتھ عقیدت اور وابستگی ایک کھلی حقیقت ہے، ناگہانی آفات کی صورت میں بھی بیرون ملک پاکستانی سب سے پہلے امداد کی اپیل پر لبیک کہتے ہیں۔
