فرمان الہی
نماز کے اوقات
اسلام آباد(صالح ظافر) واشنگٹن پوسٹ نے اپنی رپورٹ میں کہا ہے کہ پاکستان اور امریکا کے تعلقات ایک نئے دور میں داخل ہوگئے ہیں اور اس کا کریڈٹ پاکستان کی کامیاب سفارت کاری کو جاتا ہے۔ رپورٹ کے مطابق آرمی چیف فیلڈ مارشل سید عاصم منیر کا حالیہ واشنگٹن دورہ پاک-امریکہ تعلقات کے لیے ’’نئی جہت کی علامت‘‘ قرار دی گئی ہے۔ امریکی تھنک ٹینک یو ایس انسٹی ٹیوٹ آف پیس کے ماہر ڈاکٹر ڈینیئل ایس مارکی نے کہا کہ پاکستان ٹرمپ انتظامیہ سے قریبی تعلقات کے لیے ’’ہر حربہ‘‘ استعمال کر رہا ہے، جس میں عسکری، تجارتی اور توانائی شعبوں میں تعاون شامل ہے۔اخبار نے لکھا کہ امریکہ نے پاکستان کی انسدادِ دہشت گردی کارروائیوں کو سراہتے ہوئے بلوچ لبریشن آرمی (BLA) کو عالمی دہشت گرد تنظیم قرار دیا۔ پاکستان نے امریکہ کو کرپٹو کرنسی، معدنی وسائل اور توانائی کے منصوبوں میں تعاون کی پیشکش کی، جس پر صدر ڈونلڈ ٹرمپ نے سرمایہ کاری کی خواہش ظاہر کی۔اکانومسٹ نے بھی ایک تفصیلی مضمون میں فیلڈ مارشل عاصم منیر کو پاکستان کی خارجہ پالیسی کے معمار قرار دیا اور ان کی 18 جون کو وائٹ ہاؤس میں ڈونلڈ ٹرمپ سے ملاقات کو خطے میں سفارت کاری کا نیا موڑ قرار دیا۔حالیہ پیش رفت میں امریکہ نے بھارت پر 25 فیصد ٹیرف عائد کرتے ہوئے اسے ’’کمزور معیشت‘‘ قرار دیا جبکہ پاکستان کے ساتھ صرف 19 فیصد ٹیرف پر تجارتی معاہدہ کیا۔ مبصرین کے مطابق یہ پیش رفت جنوبی ایشیا، چین اور مشرقِ وسطیٰ میں امریکہ کی اسٹریٹجک ترجیحات میں تبدیلی کا عندیہ دیتی ہے۔
