فرمان الہی
نماز کے اوقات
کراچی (اسٹاف رپورٹر) آسٹریلیا نے جنوبی افریقا کوتیسرے ون ڈے انٹرنیشنل یک طرفہ مقابلے کے بعد 276رنز کے بڑے روند ڈالا ۔ جنوبی افریقا نے سیریز کے پہلے دونوں میچ جیتے تھے اسے ون ڈے سیریز کی تاریخ کی سب سے بڑی شکست کا سامنا کرنا پڑا جبکہ آسٹریلیا کو دوسری بڑی جیت ملی۔ تاہم مہمان ٹیم نے عالمی چیمپئن کے خلاف سیریز دو ایک سے جیت لی۔ میکے میں ٹریوس ہیڈ نے103گیندوں پر 142رنز بناکر پلیئر آف دی میچ ایوارڈ حاصل کیا۔ مچل مارش اور کیمرون گرین نے بھی تھری فیگر اننگز سجائیں جبکہ چوتھے بیٹر الیکس کیری نے نصف سنچری اسکور کی۔ ون ڈے کرکٹ میں یہ دوسرا موقع ہے جب ابتدائی تین بیٹرز نے سنچری اسکور کی ہو۔ جبکہ ون ڈے کی ایک اننگز میں تین سنچریاں اسکور کرنے کا یہ پانچواں موقع ہے۔ پروٹیز کے اسپنر کیشو مہاراج نے37رنز بنانے کے علاوہ سیریز میں چھ وکٹیں لیں انہیں پلیئر آف دی سیریز قرار دیا گیا۔ تیسرے ایک روزہ میچ میں432رنز کے ہدف کے تعاقب میں جنوبی افریقی بیٹنگ لائن ریت کی دیوار ثابت ہوئی اور 155رنز پر آل آؤٹ ہوگئی۔ ڈیوالڈ بریوس نے جارحانہ انداز اپناتے ہوئے 28 گیندوں پر پانچ چھکوں اور دو چوکوں کی مدد سے 49رنز بنائے۔ ٹونی ڈی زورزی 33، کپتان ٹمباباووما 19، کوربن بوش 17، رائن ریکلٹن 11، ویان ملڈر 5، ایڈن مارکرام اور کیشو مہاراج دو،دو جبکہ ٹرسٹن اسٹبز ایک رن بناکر آؤٹ ہوئے۔ سینوران متھوسامی نو رنز بناکر ناٹ آؤٹ رہے۔ کوپر کونولی نے پانچ وکٹیں حاصل کیں ۔ وہ آسٹریلیا کی جانب سے ون ڈے میچ میں پانچ وکٹیں حاصل کرنے والے سب سے کم عمر کھلاڑی بن گئے۔ زیویئر بارٹلیٹ، شان ایبٹ نے دو، دو اور ایڈم زیمپا نے ایک وکٹ حاصل کی۔ اس سے قبل آسٹریلیا نے ٹاس جیت کر پہلے بیٹنگ کرتے ہوئے 431 رنز بنائے ۔ ٹریوس ہیڈ (142) اور کپتان مچل مارش (100) نے 250 رنز کی اوپننگ پارٹنرشپ قائم کی ۔ ون ڈاؤن پوزیش پر آنے والے کیمرون گرین نے بھی جارحانہ بیٹنگ کا مظاہرہ کیا اور صرف 55 گیندوں پر 118رنز کی شاندار ناقابل شکست اننگز کھیلی۔ انہوں نے 47 گیندوں پر اپنی سنچری مکمل کی جو ون ڈے کرکٹ میں آسٹریلیا کی جانب سے دوسری تیز ترین سنچری ہے۔ ان کی اننگز میں آٹھ چھکے اور چھ چوکے شامل تھے۔ ایلکس کیری 50رنز بناکر ناٹ آؤٹ رہے ۔ جنوبی افریقا کی جانب سے کیشو مہاراج اور سینوران متھوسامی ایک ایک وکٹ حاصل کرسکے تھے۔
