• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

چیف منسٹر کرکٹ گولڈ کپ یکم ستمبر سے کوئٹہ میں شروع ہوگا

میرا شہر
کوئٹہ
30 اگست ، 2025
کوئٹہ ( اسٹاف رپورٹر)سیکرٹری کھیل درا بلوچ نے کہا ہے کہ آل پاکستان چیف منسٹر کرکٹ گولڈ کپ یکم ستمبر سے کوئٹہ میں شروع ہورہا ہے جس میں پاکستان بھر سے 27ٹیمیں حصہ لے رہی ہیں ٹورنامنٹ کا افتتاحی میچ کوئٹہ ریجن اور پشاور کے درمیان بگٹی کرکٹ اسٹیڈیم کھیلا جائے گا ،ٹورنامنٹ میں حصہ لینے کیلئے کرکٹ ٹیمیں کوئٹہ پہنچنا شروع ہوگئی ہیں جنہیں ہرممکن سہولیات کی فراہمی یقینی بنائی جارہی ہے ۔یہ بات انہوں نے جمعہ کو آل پاکستان وزیراعلیٰ بلوچستان کرکٹ گولڈ کپ ٹورنامنٹ کی تیاریوں کا جائزہ اجلاس سے خطاب کرتے ہوئے کہی۔ اجلاس میں ڈی جی سپورٹس یاسر بازئی محکمہ کھیل کے افسران نے ٹورنامنٹ کی تیاریوں کے بارے میں سیکرٹری اور ڈی جی سپورٹس کو بریفنگ دی۔سیکرٹری سپورٹسنے کہا کہ دوسرے آل پاکستان وزیراعلیٰ بلوچستان کرکٹ گولڈ کپ یکم ستمبر سے 14ستمبرتک کوئٹہ میں جاری رہے گا جس میں پورے پاکستان سے 27ٹیمیں شریک ہوں گی جن میں 16ریجنل ٹیموں کی شمولیت کے ساتھ کوئٹہ کے مختلف گراونڈز میں میچز کھیلے جائیں گے۔ انہوں نے کہاکہ سی ایم کرکٹ گولڈ کپ کا شاندار آغاز رنگا رنگ تقریب اورمیوزیکل شو سے ہوگا ۔انہوں نے کہا کہ ٹورنامنٹ میں حصہ لینے والی ٹیموں کو رہائش ، ٹرانسپورٹ سمیت دیگر سہولیات فراہم کی جارہی ہیں ٹورنامنٹ کے انتظامات کے لئے مختلف ٹیمیں تشکیل دی گئی ہیں جو تمام معاملات کو دیکھیں گی۔ انہوں نے کہا کہ وزیراعلیٰ بلوچستان میر سرفراز بگٹی ، مشیر کھیل مینا مجید کی خصوصی ہدایت پر نوجوانوں کو کھیلوں کی طرف راغب کرنے کیلئے محکمہ کھیل بلوچستان مختلف ٹورنامنٹ کا انعقاد کر رہا ہے جس سے نیا ٹیلنٹ ابھر کر سامنے آئے گا اور شائقین کو بہترین میچ دیکھنے کو ملیں گے۔ ڈی جی سپورٹس یاسر بازئی نے کہا کہ گرمی کی وجہ سے ٹورنامنٹ کے میچز رات کے وقت ہونگے جس کیلئے گراونڈ میں فلڈ لائٹس نصب کردی گئی ہیں۔ انہوںنے کہا کہ ٹورنامنٹ کا افتتاحی میچ یکم ستمبر پیر کو شام سات بجے بگٹی کرکٹ اسٹیڈیم کوئٹہ میں کوئٹہ ریجن اور پشاور کے درمیان کھیلا جائے گا۔
کوئٹہ سے مزید