• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

وفاقی اردو یونیورسٹی میں مالی اور انتظامی بے ضابطگیوں کی شکایات پر چار رکنی کمیٹی قائم

آج کا اخبار
اہم خبریں
01 ستمبر ، 2025
کراچی( سید محمد عسکری) ہائر ایجوکیشن کمیشن کے چیرمین نے فیڈرل اردو یونیورسٹی آف آرٹس، سائنسز اینڈ ٹیکنالوجی اسلام آباد اور کراچی دونوں کیمپسز میں مالی اور انتظامی بے ضابطگیوں کے حوالے سے موصول ہونے والی متعدد شکایات کے پیش نظر چار رکنی کمیٹی قائم کردی ہے جو اردو یونیورسٹی میں گورننس اینڈ ہیومن ریسورس کے معاملات کا آڈٹ کرے گی۔ کمیٹی کے کنوینئر مشیر ایچ ای سی انجینئر محمد رضا چوہان ہوں گے جب کہ اراکین میں وزارت تعلیم و پیشہ ور تربیت کے سینئر جوائنٹ سیکرٹری آفتاب رشید، ڈائریکٹر جنرل ریجنل سینٹر کراچی نزیر حسین اور اسسٹنٹ ڈائریکٹر (کوآرڈینیشن)، ایچ ای سی، اسلام آباد حماد بن سیف رکن/سیکرٹری ہوں گے۔ یہ کمیٹی اردو یونیورسٹی کے گورننس، مالیاتی انتظام، اور سروس سے متعلقہ طریقوں کا جائزہ لے گی، کمیٹی قابل اطلاق سروس رولز، بھرتی کے ضوابط، اور شکایات کے ازالے کے طریقہ کار کی تعمیل کا جائزہ لے گی۔ کمیٹی متعلقہ حکام اور فورمز کے سامنے زیر التواء قانونی اور ریگولیٹری معاملات کا جائزہ لے گی۔ کمیٹی کو اختیار ہوگا کہ وہ اردو یونیورسٹی میں قانونی یا انتظامی عہدوں پر فائز افراد کے ذریعے استعمال کیے جانے والے اختیارات اور افعال کا اندازہ کرے چاہے وہ باقاعدہ، عبوری، یا اضافی چارج کی بنیاد پر ہوں اور اختیارات کی زیادتی یا غلط استعمال کی کسی بھی مثال کی جانچ کرے گی، خاص طور پر فیکلٹی اور عملے کے خلاف ہراساں کرنے، امتیازی سلوک، اور انتقامی کارروائی کے اثرات کی مثالوں کا جائزہ لے گی، کمیٹی مشاہدات کو ثابت کرنے اور تصدیق کرنے کے لیے یونیورسٹی کے حکام، فیکلٹی، اور عملے کے ساتھ رابطہ کرے گی۔ یہ کمیٹی پندرہ (15) روز کے اندر، نتائج اور قابل عمل سفارشات کے ساتھ ایک جامع رپورٹ جمع کروائے گی۔
اہم خبریں سے مزید