• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

کراچی میں ترک قونصل جنرل جمال سانگو کے اعزاز میں پروقار تقریب

آج کا اخبار
اہم خبریں
03 ستمبر ، 2025
کراچی( رپورٹ/اختر علی اختر) کراچی میں ترکیہ کے قونصل جنرل جمال سانگو کے اعزاز میں پروقارتقریب کا اہتمام آرٹس کونسل کے تحت کیاگیا، جس میں پاکستان پیپلزپارٹی خواتین ونگ کی چیئرپرسن اور ایم پی اے فریال تالپو، صوبائی وزیر ثقافت سید ذوالفقارعلی شاہ، صدر پی پی پی کراچی ڈویژن و صوبائی وزیر بلدیات سعید غنی،صوبائی وزیر داخلہ ضیاءالحسن لنجار، میئر کراچی مرتضیٰ وہاب، سینئر رہنما نثار کھوڑو، سینئیراداکارمنور سعید، معروف ڈراما رائٹرنورالہدیٰ شاہ، ایڈیشنل آئی جی کراچی جاوید عالم اوڈھو، قاسم سومرو،مختلف ممالک کے قونصل جنرل سمیت اہم شخصیات نے شرکت کی۔ اس موقع پرپاکستان پیپلزپارٹی خواتین ونگ کی چیئرپرسن اور ایم پی اے فریال تالپور نے گفتگو کرتے ہوئے کہا کہ پاکستان کے ترکیہ کے ساتھ قدیمی تعلقات ہیں، ان کے پَر دادا حسن علی آفندی سندھ میں ترکیہ کے پہلے قونصل جنرل تھے۔ انہوں نے 1885ءمیں سندھ مدرستہ الاسلام کی بنیاد رکھی، جو جدید دور کے کراچی میں واقع ہے۔ فریال تالپور نے جمال سانگو کے لیے نیک خواہشات کا اظہار بھی کیا۔ قونصل جنرل جمال سانگو نے سندھ اور ترکیہ تعلقات پر حسن علی آفندی کے کردار کی تعریف کی، انہوں نے پاکستان پیپلزپارٹی خواتین ونگ کی چیئرپرسن فریال تالپور اور صدر پاکستان آصف علی زرداری کا ترکیہ اور پاکستان کے تاریخی تعلقات قائم رکھنے پر شکریہ ادا کیا اور ان کی کاوشوں کو سراہا۔ آخر میں چیئرپرسن پی پی پی خواتین ونگ و ایم پی اے فریال تالپور نے کراچی میں ترکیہ کے قونصل جنرل جمال سانگو کو مرزا قلیچ بیگ کی کتاب ”خان بہادر حسن علی آفندی“ اور گلدستہ پیش کیا۔ قبل ازیں تقریب کے میزبان اور صدر آرٹس کونسل محمد احمد شاہ نے پاک۔ترک ثقافتی تعلقات کو مضبوط بنانے، تعاون اور مشترکہ ورثے پر گہری وابستگی کا اظہار کرتے ہوئے پاک ترکیہ کے تاریخی رشتے کی اہمیت کو واضح کیا۔ انہوں نے اراکین گورننگ باڈی کےساتھ مہمانوں کا پُر تپاک استقبال کیا۔
اہم خبریں سے مزید