فرمان الہی
نماز کے اوقات
کراچی (اسٹاف رپورٹر ) سندھ ہائی کورٹ نے بینک مورگیج گھر فروخت کرنے سے متعلق درخواست پر فریقین سے دلائل طلب کرلیئے۔ ہائی کورٹ میں نجی بینک سے قرضہ حاصل کرکے مورگیج گھر دوسرے فریق کو فروخت کرنے سے متعلق درخواست کی سماعت ہوئی۔ درخواست گزار کے وکیل نے کہا کہ ہم بینک سے سیٹلمنٹ کرنے کے لئے تیار ہیں۔ جسٹس محمد اقبال کلہوڑو نے ریمارکس دیئے کہ درخواست گزار کو خدا کو خوف نہیں ہے؟ جس گھر پر بینک سے قرضہ حاصل کیا وہ کسی کو بیچ دیا۔ یہاں تو جوڑ توڑ کر لو گے اوپر ایک اور بھی عدالت یے وہاں کیسے کرو گے؟ ڈرو اس دن سے جس دن اوپر والے کی پکڑ ہوگی۔ نجی بنک کے وکیل نے کہا کہ درخواست گزار نے ایف بی ایریا کے گھر پر 2019 میں بینک سے 2 کروڑ روپے قرضہ لیا۔ بنک نے درخواست گزار سید کاظم رضا کا گھر مورگیج رکھا تھا۔ درخواست گزار نے مورگیج گھر کسی پرائیویٹ شخص کو بیچ دیا اور بینک کو پیسہ بھی ادا نہیں کیا۔ درخواست گزار کے وکیل نے کہا کہ عدالت حکم دے تو جو بھی رقم بنتی ہے ہم دینے کے لئے تیار ہیں۔ عدالت نے برہمی کا اظہار کرتے ہوئے ریمارکس دیئے کہ پہلے گھر بیچ دیا اب یہ بھی عدالت آپ کو حکم دے؟ جو کرنا ہے بینک کے ساتھ کریں۔
