فرمان الہی
نماز کے اوقات
کراچی (مانیٹرنگ ڈیسک) شہر قائد میں شدید بارشوں کے باعث تھڈو ڈیم اوور فلو کر گیا، جسکے بعد سیلابی پانی کا طاقتور ریلا ایم 9 موٹروے تک پہنچ گیا۔ کراچی، حیدرآباد ٹریفک کیلئے بند، سیلابی پانی سعدی ٹاؤن میں داخل، مکینوں میں خوف و ہراس، لیاری ندی میں بھی طغیانی، پانی سڑکوں اور گھروں میں داخل ہوگیا۔ تفصیلات کے مطابق کراچی میں شدید بارشوں کے باعث تھڈو ڈیم اوور فلو کر گیا،سپر ہائی وے پر واقع نجی ریسٹورینٹ کے اطراف سڑک زیر آب آ گئی ہے، جسکی وجہ سے کراچی سے حیدرآباد اور حیدرآباد سے کراچی دونوں اطراف کی ٹریفک مکمل طور پر بند کر دی گئی ہے۔ نیشنل ہائی ویز اینڈ موٹروے پولیس نے تصدیق کی ہے کہ پانی کی سطح بلند ہو کر موٹروے کے کنارے سے ٹکرا چکی ہے، اور سپر ہائی وے کا بڑا حصہ زیر آب آ گیا ہے۔ اس کے پیشِ نظر ایم 9 کے درمیان موجود کرش بیرئیر کو ہٹا کر پانی کے بہاؤ کا راستہ دینے کی کوشش کی جا رہی ہے۔ وزیراعلیٰ سندھ کی ہدایت پر کمشنر کراچی نے ریسکیو اور امدادی ٹیموں کو فوری طور پر متحرک کر دیا ہے۔ ترجمان وزیراعلیٰ ہاؤس کے مطابق صورتحال کا جائزہ لے کر موٹروے کے درمیانی دیوار کو توڑ کر پانی نکالا جا رہا ہے تاکہ ٹریفک بحال کی جا سکے۔گڈاپ ٹاؤن میں واقع تھڈو ڈیم شدید بارشوں کے بعد اوور فلو ہوا جس سے نکلنے والا سیلابی ریلا سعدی ٹاؤن میں داخل ہو گیا۔
