فرمان الہی
نماز کے اوقات
اسلام آباد (نیوز رپورٹر) وزیر اعظم محمد شہباز شریف نے واضح کیا ہے کہ افغانستان خوارج یا پاکستان میں سے ایک کا انتخاب کر لیں، دہشت گردوں کے سرغنہ اور سہولت کار افغانستان میں ہیں، پشت پناہی بھارت کر رہا ہے، دہشت گردی کا بھرپور جواب جاری رہے گا اور اس میں کسی قسم کا کوئی ابہام برداشت نہیں کیا جائے گا۔ ان خیالات کا اظہار انہوں نے کمبائنڈ ملٹر ی اسپتال (سی ایم ایچ) بنوں میں زخمی جوانوں کی عیادت کے بعد گفتگو کرتے ہوئے کیا۔ قبل ازیں وزیر اعظم شہباز شریف کے بنوں پہنچنے پر فیلڈ مارشل نے بنوں کنٹونمنٹ میں اْنکا استقبال کیا۔بعدازانشہباز شریف اور آرمی چیف عاصم منیر نے جنوبی وزیرستان آپریشن میں شہید ہونے والے 12 جوانوں کی نماز جنازہ میں بھی شرکت کی۔سکیورٹی ذرائع کے مطابق کور کمانڈر پشاور نے علاقے کی سیکورٹی صورتحال پر تفصیلاً بریف کیا۔ انہیں بتایا گیا کہ دہشت گردوں کے سرغنہ اور سہولت کار افغانستان میں ہیں، ان دہشت گردوں کی پشت پناہی بھارت کر رہا ہے۔ وزیر اعظم شہباز شریف اور فیلڈ مارشل عاصم منیر نے بنوں کا دورہ کیا اور دہشت گردی سے متعلق اہم اور اعلیٰ سطح کے اجلاس میں شرکت کی۔کمبائنڈ ملٹر ی ہسپتال (سی ایم ایچ) بنوں میں زخمی جوانوں کی عیادت کے بعد وزیراعظم شہباز شریف نے گفتگو کرتے ہوئے کہا کہ افغانستان کو واضح طور پر پیغام دینا چاہتا ہوں، 2 چیزوں میں سے کسی ایک کا انتخاب کر لیں،اگر افغان حکومت پاکستان کے ساتھ تعلقات قائم کرنا چاہتی ہے تو ایمانداری اور سچائی کے ساتھ تعلقات قائم کرے، جس کیلئے ہم پہلے سے تیار ہیں، تاہم اگر افغانستان کی حکومت کو دہشت گردوں کا ساتھ دینا ہے اور اْنکی پشت پناہی کرنی ہے،تو پھر ہمیں بھی افغانستان کی قائم مقام حکومت سے کوئی سروکار نہیں، افواج پاکستان فیلڈ مارشل کی سربراہی میں ہر صورت ان دہشت گردوں کا خاتمہ کریں گی۔شہباز شریف نے کہا کہ ملک میں امن ہو گا تو ترقی اور خوشحالی ہوگی، اگر خدانخواستہ امن تباہ ہوگیا تو نہ ملک میں ترقی ہو گی اور نہ ہی خوشحالی۔دورہِ بنوں کے دوران فیلڈ مارشل اور کور کمانڈر پشاور سے دیگر اعلیٰ فوجی قیادت سے گفتگو کی ہے، پاکستان کے بہترین مفاد میں فیصلے کرینگے، جلد کابینہ کے پاس ان فیصلوں کو لے کر جاؤں گا، جس پر بحث کے بعد حتمی فیصلہ کر کے فوری عمل درآمد کیا جائیگا۔وزیراعظم نے اس موقع پرکہا کہ غیر قانونی طور پر پاکستان میں مقیم افغان باشندوں کا جلد انخلا انتہائی اہم ہے، پاکستانی قوم دہشت گردی کے معاملے پر سیاست اور گمراہ کن بیانیے کو مکمل طور پر رد کرتی ہے۔
