فرمان الہی
نماز کے اوقات
کراچی( اسٹاف رپورٹر)جماعت اسلامی کے تحت اسرائیلی جارحیت و دہشت گردی کے شکار اہل غزہ بالخصوص معصوم بچوں سے اظہار یکجہتی کے لیے جمعرات 18ستمبر کو صبح 10بجے شاہراہ قائدین پر ہونے والے ”کراچی چلڈرن غزہ مارچ“ کی تیاریاں تیزی سے جاری ہیں، اسکولوں میں بڑے پیمانے پر رابطے کیے جارہے ہیں، مارچ میں شہر بھر کے نجی و سرکاری اسکولوں کے طلبہ و طالبات بڑی تعداد میں شریک ہوں گے، مارچ سے امیر جماعت اسلامی پاکستان حافظ نعیم الرحمنٰ خصوصی خطاب کریں گے، امیر جماعت اسلامی کراچی منعم ظفر خان کی جانب سے اسکولوں کے پرنسپلز اور منتظمین کو ”کراچی چلڈرن غزہ مارچ“ کے حوالے سے خطوط بھی ارسال کیے گئے ہیں، غزہ چلڈرن مارچ کی تیاریوں و انتظامات کے لیے اور مارچ کو بھر پور اور کامیاب بنانے کے لیے متعدد کمیٹیاں تشکیل دی گئی ہیں، جماعت اسلامی کراچی کے سیکریٹری توفیق الدین صدیقی کی زیر صدارت ادارہ نور حق میں پیر کے روز ”کراچی چلڈرن غزہ مارچ“ کے حوالے سے ذمہ داران کا اہم اجلاس منعقد ہوا جس میں مارچ کی تیاریوں و انتظامات کا جائزہ لیا گیا، متعدد فیصلے اور اقدامات طے کیے گئے اور ذمہ داران کے لیے ضروری ہدایات بھی جاری کی گئیں،مارچ میں اسکول کے بچے پوسٹر سازی، تقاریر اور پریزینٹیشنز کے ذریعے بھی اپنی آواز قومی و بین الاقوامی میڈیا پر اُجاگر کریں گے، دریں اثناء منعم ظفر خان نے اپنے ایک بیان میں کہا ہےکہ 23ماہ سے غزہ لہو میں نہا رہا ہے، 65ہزار سے زائد فلسطینی ، 22ہزار سے زائد معصوم بچے شہید، مساجد، ہسپتال، اسکول، پناہ گزین کیمپ‘ سب پر حملے، عورتیں، بوڑھے اور بچے ظلم کا نشانہ، امریکا اور اسرائیل کی درندگی نے غزہ کو قبرستان بنا دیا ہے۔
