فرمان الہی
نماز کے اوقات
دبئی (نمائندہ خصوصی) جنوبی افریقا نے پاکستان ویمنز کو پہلے ون ڈے انٹرنیشنل میں 8 وکٹوں سے شکست دے کر تین میچوں کی سیریز میں ایک صفر کی برتری حاصل کرلی۔ میچ کی خاص بات مہمان ٹیم کی ماریزان کیپ اور تیزمین برٹس جبکہ پاکستان کی سدرہ امین کی سنچریاں تھیں۔ قذافی اسٹیڈیم لاہور میں منگل کو پہلے ون ڈے انٹرنیشنل میں ٹاس جیت کر پاکستان نے بیٹنگ کرتے ہوئے 4 وکٹوں پر255 رنز بنائے۔ جنوبی افریقہ نے 48.2 اوورز میں دو وکٹ پر ہدف حاصل کرلیا۔ پاکستان کو اننگز کے دوسرے ہی اوور میں نقصان اٹھانا پڑا جب شوال ذوالفقار بغیر کوئی رن بنائے آؤٹ ہوگئیں ۔ منیبہ علی اور سدرہ امین نے دوسری وکٹ کی شراکت میں 147 رنز کا اضافہ کیا جو ون ڈے انٹرنیشنل میں پاکستان ویمنز کی دوسری وکٹ کی ریکارڈ شراکت ہے۔ اس سے قبل یہ ریکارڈ 143 رنز کا تھا جس میں سدرہ امین اور بسمہ معروف شریک تھیں۔ منیبہ علی نے اپنے 50 ویں ون ڈے انٹرنیشنل میں پانچویں نصف سنچری بنائی، انہوں نے 11 چوکوں کی مدد سے 76 رنز بنائے۔ سدرہ امین نے 150 گیندوں پر 12 چوکوں کی مدد سے121 رنز ناٹ آؤٹ اسکور کیے ۔ یہ ان کی ون ڈے انٹرنیشنل میں 5 ویں سنچری ہے۔ عالیہ ریاض نے 5 چوکوں کی مدد سے 33 رنز کی اننگز کھیلی اور سدرہ امین کے ساتھ تیسری وکٹ کی شراکت میں 68 رنز کا اضافہ کیا۔ کپتان فاطمہ ثنا 3 رنز بناکر آؤٹ ہوئیں۔ نتالیہ پرویز5 رنز پر ناٹ آؤٹ رہیں۔ آیابونگا کھاکا نے دو وکٹیں حاصل کیں۔ جنوبی افریقا کی اننگز میں کپتان وولوارٹ 4 رنز بناکر سعدیہ اقبال کی گیند پر بولڈ ہوگئیں۔ سونے لوز کو 30 رنز پر رامین شمیم نے آؤٹ کردیا جس کے بعد تیزمین برٹس اور ماریزان کیپ نے216 رنز کی شراکت قائم کرکے اپنی ٹیم کی جیت کو ممکن بنادیا۔ یہ جنوبی افریقہ کی تیسری وکٹ کی ریکارڈ شراکت بھی ہے۔برٹس 9 چوکوں کی مدد سے 101 رنز بناکر ناٹ آؤٹ رہیں۔ یہ ان کی پانچویں سنچری ہے۔ کیپ نے 13 چوکوں اور 2 چھکوں کی مدد سے کریئر بیسٹ 121 رنز اسکور کیے ۔ یہ ان کی چوتھی سنچری ہے۔
