فرمان الہی
نماز کے اوقات
کراچی ( اسٹاف رپورٹر)سندھ ایمپلائیز الائنس کی چیف سیکریٹری سندھ سے ملاقات، احتجاج ختم کرنے کا اعلان، چیف سیکرٹری نے کہا کہ سندھ حکومت سرکاری ملازمین کے مسائل کو سنجیدگی سے دیکھ رہی ہے اور ان کے حل کے لئے تمام ممکنہ اقدامات کئے جائیں گے،سندھ ایمپلائیز الائنس کے 8رکنی وفد نے، حاجی اشرف خاصخیلی کی قیادت میں چیف سیکریٹری سندھ آصف حیدر شاہ سے سندھ سیکریٹریٹ میں ملاقات کی۔ ملاقات میں سیکریٹری اسکول ایجوکیشن، سیکریٹری خزانہ، سیکریٹری جنرل ایڈمنسٹریشن اور ڈپٹی کمشنر ساؤتھ شریک ہوئے۔ یہ ملاقات چیئرمین پاکستان پیپلز پارٹی بلاول بھٹو زرداری اور وزیر اعلیٰ سندھ سید مراد علی شاہ کی خصوصی ہدایات پر منعقد ہوئی۔ ملاقات میں سرکاری ملازمین کو درپیش مسائل بالخصوص پنشن اصلاحات، ڈی آر اے الاؤنس، گروپ انشورنس اور دیگر مطالبات پر تفصیلی غور و خوض کیا گیا۔ ملاقات کے دوران چیف سیکریٹری سندھ نے وزیر اعلیٰ سندھ سے ٹیلیفونک رابطہ کیا اور انہیں ملازمین کے مسائل سے آگاہ کیا۔ وزیر اعلیٰ سندھ نے یقین دہانی کرائی کہ ان امور کو پیر کو ہونے والے کابینہ اجلاس کے ایجنڈے میں شامل کیا جائے گا۔اس مثبت پیش رفت کے بعد سندھ ایمپلائیز الائنس نے 6 اکتوبر کو ہونے والا دھرنا موخر کرنے اور احتجاج ختم کرنے کا اعلان کیا۔ چیئرمین الائنس حاجی اشرف خاصخیلی نے کہا کہ کل سے تمام ملازمین دفاتر میں حاضر ہو کر اپنی ذمہ داریاں سرانجام دیں گے۔ مزید برآں، ایک اعلیٰ سطح کمیٹی قائم کی گئی ہے جس میں سیکریٹری جنرل ایڈمنسٹریشن، سیکریٹری خزانہ، سیکریٹری اسکول ایجوکیشن اور سیکریٹری قانون شامل ہوں گے، جبکہ سندھ ایمپلائیز الائنس کے چار نمائندے بھی اس کمیٹی کا حصہ ہوں گے۔چیف سیکریٹری سندھ آصف حیدر شاہ نے کہا کہ سندھ حکومت سرکاری ملازمین کے مسائل کو سنجیدگی سے دیکھ رہی ہے اور ان کے حل کے لئے تمام ممکنہ اقدامات کئے جائیں گے۔ انہوں نے کہا، “چیف سیکریٹری ہونے کے ناتے میری ذمہ داری ہے کہ ملازمین کے جائز مسائل کو حکومت کے سامنے رکھوں اور ان کے حل کے لئے تعمیری اقدامات کو یقینی بناؤں۔”بعد ازاں سروسز اینڈ جنرل ایڈمنسٹریشن ڈپارٹمنٹ کی جانب سے آئندہ سندھ کابینہ اجلاس کا ایجنڈا جاری کیا گیا، جس میں سندھ ایمپلائیز الائنس کی جانب سے اٹھائے گئے مسائل کو شامل کیا گیا ہے۔ ایجنڈے میں تنخواہیں اور ڈی آر اے الاؤنس، گروپ انشورنس و بینیولنٹ فنڈ، اور پنشن اصلاحات جیسے اہم معاملات شامل ہیں۔ ان امور پر کابینہ اجلاس میں تفصیلی غور کیا جائے گا۔
