فرمان الہی
نماز کے اوقات
کراچی (اسٹاف رپورٹر) پاکستانی کرکٹ ٹیم نے جنوبی افریقا کے خلاف ٹیسٹ سیریز کی تیاریوں کا آغاز کردیا۔ قذافی اسٹیڈیم میں جمعرات کو کھلاڑیوں نے تین گھنٹے پریکٹس کی۔ پاکستان کرکٹ بورڈ کے چیئرمین محسن نقوی نے ڈائریکٹر ہائی پرفارمنس اور قومی سلیکٹر عاقب جاوید کے ساتھ پریکٹس دیکھی انہوں نے کپتان شان مسعوداورہیڈ کوچ اظہر محمود کے ساتھ ٹیم کی حکمت عملی پر بات چیت کی وہ فرداً فرداً کھلاریوں سے ملے۔ بعدازاں میڈیا سے گفتگو میں پاکستان ریڈ بال ٹیم کے عبوری ہیڈ کوچ اظہر محمود نے کہا کہ پروٹیز ٹیم ٹیسٹ چیمپئن شپ جیت کر آئی ہے لیکن ہم ہوم گراؤنڈ کی کنڈیشنز سے بھرپور فائدہ اٹھانے کی کوشش کریں گے۔ ہم نے ایک سال میں ٹیسٹ چیمپئن شپ میں چھ میچ کھیلنے ہیں۔ ہمارا فوکس مثبت کرکٹ کھیلنے پر ہے۔ ہم مکمل طور پر تیار ہیں اور امید ہے کہ سیریز جیتیں گے۔ پتہ نہیں کیوں آصف آفریدی پر تنقید ہو رہی ہے وہ ڈومیسٹک میں پرفارم کر کے آئے ہیں جہاں تک عمر کا تعلق ہے وہ صرف ایک نمبر ہے۔ جنوبی افریقا کی ٹیم بھی ایک سینئر اسپنر کو لائی ہے ان کی عمر بھی 38 برس ہے ، انہوں نے دو ڈومیسٹک سیزن میں 80 آؤٹ کیے ہیں۔ جنوبی افریقاکی اسٹرنتھ کا علم ہے۔ یہاں پچ پر گیند اسپن ضرور ہوگی مگر اتنی نہیں جتنی انگلینڈ کے خلاف ہوئی تھی۔ ہم نے اب دیکھنا ہے کہ ہم 20 وکٹیں کیسے لیں گے۔ ابھی تک پلیئنگ الیون کا فیصلہ نہیں کیا، پچ کو دیکھ کر ٹیم کا فیصلہ کریں گے۔ ہمارے مین وکٹ کیپرمحمد رضوان ہیں ان کے بعد ہم روحیل نذیر کو دیکھتے ہیں۔ وائٹ بال فارمیٹ کے ہیڈ کوچ مائیک ہیسن کے کیمپ میں آنے پر مجھے کوئی اعتراض نہیں ہے۔ انہوں نے وائٹ بال ٹیم کا انتخاب کرنا ہے، ان کے ساتھ مل کے کام کر رہے ہیں۔ انہوں نے کہا کہ تمام کھلاڑی کھیلتے آ رہے ہیں اس کا ہمیں فائدہ ہے، پلان کے مطابق کھیلے تو اس مرتبہ ٹیسٹ چیمپئن شپ میں ہماری کارکردگی اچھی ہوگی۔ ابھی فیصلہ نہیں کیا کہ دو فاسٹ بولرز اور دو اسپنرز کے ساتھ جانا ہے، میچ والے دن فیصلہ ہوگا کہ ایک فاسٹ بولر ہو گا یا تین اسپنرز کو کھلانا ہے۔
