فرمان الہی
نماز کے اوقات
لاہور / مریدکے(نمائندگان و نامہ نگاران) مرید کے، مظاہرین منتشر، جھڑپوں میں SHO سمیت 5 افراد جاں بحق، درجنوں زخمی۔ پولیس نے مذہبی جماعت (ٹی ایل پی) کے لانگ مارچ کے خلاف آپریشن مکمل کر لیا اور دھرنا ختم کرادیا گیا ۔ مظاہرین کی فائرنگ سے ایس ایچ او فیکٹری ایریا شہزاد جھمٹ شہید ہوگئے،3 کارکنوں سمیت 5 افراد جاں بحق،48 اہلکار زخمی ہوگئے۔متعدد شہری بھی زخمی ہوئے جبکہ درجنوں کارکنوں کو گرفتار کرلیا گیا ہے۔ذرائع کے مطابق سیکیورٹی اداروں نے کرین پارٹی کے خلاف آپریشن کرتے ہوئے تمام کارکنان کو منتشر کرکے جی ٹی روڈ کو خالی کروا لیا۔ سیکیورٹی اداروں نے پورے جی ٹی روڈ کا مکمل کنٹرول حاصل کرلیا ہے۔پولیس کے مطابق مظاہرین کو منتشر کرنے کی کارروائی کے دوران ٹی ایل پی کے کارکنوں نے پتھراؤ، کیل دار ڈنڈوں اور پیٹرول بموں کا استعمال کیا۔ بعد ازاں، انہوں نے اندھا دھند فائرنگ کی، جس کے نتیجے میں شہریوں اور قانون نافذ کرنے والے اہلکاروں کو جانی نقصان پہنچا۔قانون نافذ کرنے والے اداروں کو اپنی جان کے دفاع میں محدود کارروائی کرنا پڑی اور اس دوران ایک ایس ایچ او شہید جبکہ پولیس اور رینجرز کے 48 اہلکار زخمی ہوئے، جن میں 17 اہلکار گولی لگنے سے زخمی ہوئے۔ٹی ایل پی مظاہرین کی اندھا دھند فائرنگ کے نتیجے میں 3 کارکنان اور ایک راہ گیر جاں بحق ہوگیا جبکہ 8 شہری زخمی ہوئے۔مظاہرین نے 40سرکاری اور پرائیویٹ گاڑیوں کو آگ بھی لگا دی۔پولیس نے متعدد کارکنوں کو گرفتار کر لیا جبکہ آنسو گیس کی شیلنگ سے متاثر اور زخمی ہونے والوں کو مقامی اسپتال منتقل کر دیا گیا۔
