فرمان الہی
نماز کے اوقات
سفری پالیسیوں میں تبدیلیوں کا فیصلہ امریکا کو بھاری پڑ گیا۔
تاریخ میں پہلی مرتبہ دنیا کے 10طاقتور ترین پاسپورٹس کی فہرست سے امریکا باہر ہوگیا ہے۔
ہینلے پاسپورٹ انڈیکس کی تازہ رپورٹ کے مطابق امریکا پاسپورٹ درجہ بندی میں 12ویں نمبر پر چلا گیا ہے، امریکی شہریوں کو 227 میں سے صرف 180 ممالک میں بغیر ویزا کے داخلے کی اجازت ہے۔
برطانوی ذرائع ابلاغ کے مطابق امریکی پاسپورٹ کی کمزوری کی ایک بڑی وجہ مختلف ممالک کی سفری پالیسیوں میں تبدیلی قرار دی جا رہی ہے، 2014 میں امریکا اس فہرست میں پہلے نمبر پر تھا، جبکہ رواں سال جولائی تک وہ بمشکل ٹاپ 10 میں شامل تھا۔
میڈیا رپورٹس کے مطابق سنگاپور 193 ممالک میں ویزا فری رسائی کے ساتھ پہلے نمبر پر براجمان ہوگیا ہے جبکہ جنوبی کوریا دوسرے نمبر پر اور جاپان تیسرے نمبر پر موجود ہے۔
اپریل میں برازیل نے امریکا، کینیڈا اور آسٹریلیا کے شہریوں کے لیے ویزا فری داخلے کی سہولت واپس لے لی تھی جبکہ چین نے یورپی ممالک جیسے جرمنی اور فرانس کے لیے ویزا فری سہولت متعارف کرائی، مگر امریکا اس فہرست میں شامل نہ ہوسکا، اسی طرح پاپوا نیوگنی اور میانمار کی نئی داخلہ پالیسیوں نے بھی امریکا کی پوزیشن کو متاثر کیا ہے۔
صومالیہ کے نئے ای ویزا سسٹم اور ویتنام کی جانب سے امریکی شہریوں کو ویزا فری سہولت نہ دینے نے اس کمی کو مزید بڑھا دیا۔ 2015 میں چین کا نمبر 94 واں تھا، مگر 2025 میں یہ بڑھ کر 64 ویں نمبر پر پہنچ گیا ہے، یعنی چین نے گزشتہ 10 سال میں 37 مزید ممالک میں ویزا فری رسائی حاصل کی، اسی طرح متحدہ عرب امارات نے گزشتہ دہائی میں شاندار پیش رفت کی ہے اور 42 ویں پوزیشن سے بڑھ کر اب 8ویں نمبر پر پہنچ گیا ہے۔
ایک وقت میں دنیا کا سب سے طاقتور پاسپورٹ سمجھا جانے والا برطانوی پاسپورٹ بھی اب اپنی کم ترین سطح پر ہے، جولائی سے اب تک وہ چھٹی سے 8 ویں پوزیشن پر آگیا ہے۔
علاوہ ازیں افغانستان بدستور سب سے کمزور پاسپورٹ قرار پایا ہے، جس کے شہری صرف 24 ممالک میں بغیر ویزا جاسکتے ہیں۔
