فرمان الہی
نماز کے اوقات
کراچی ( اسٹاف رپورٹر ) پاکستان پیپلز پارٹی کے چیئرمین بلاول بھٹو زرداری نے کہا ہے کہ اگر وفاقی حکومت کراچی میں ترقیاتی کام کرنا چاہتی ہے تو یہ ان کیلئے باعث مسرت ہوگا، لیکن وہ جو بھی کام کریں وہ آئینی طریقے اور اٹھارویں ترمیم کے مطابق کریں،ہم خوش ہوں گے جب کراچی کیلئے کام کیا جائے، کراچی کے ترقیاتی منصوبے پر وفاق سے بات ہوئی ہے، سانحہ کارساز دہشت گردی کا بہت بڑا واقعہ تھا، بے نظیر بھٹو کا قتل ملک اور وفاق کیخلاف سازش تھی، پیپلز پارٹی آج بھی بی بی کے مشن کو آگے لیکر چل رہی ہے۔ وہ ہفتہ کو سانحہ کارساز کی 18ویں برسی کے موقع پر شاہراہ فیصل پر سانحہ کارساز کے شہداء کی یادگار پر حاضری دینے کے بعد میڈیا سے گفتگو کررہے تھے۔ بلاول بھٹو زرداری نے یادگار شہداء پر پھول رکھے اور شہداء کو خراج عقیدت پیش کیا۔ بلاول بھٹو زرداری کے ہمراہ سندھ کے وزیراعلی سید مراد علی شاہ، پی پی پی سندھ کے صدر نثار کھوڑو، سینیٹر وقار مہدی، شرجیل میمن، سعید غنی، ناصر شاہ، مرتضی وہاب، روف ناگوری اور دیگر رہنماء موجود تھے۔انہوں نے کہا کہ 18اکتوبر 2007کو بے نظیر بھٹو وطن واپس آئیں۔ شہید بی بی غریب عوام کی آواز تھیں۔کارساز کے مقام پر بے نظیر بھٹو کے قافلے پر خودکش حملہ ہوا ۔کارکنان شہید ہوئے۔ پیپلز پارٹی آج بھی شہید بے نظیر بھٹو کے فلسفہ مشن اور جدوجہد کو لے کر آگے چل رہی ہے۔
