• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

کراچی چیمبر کی جگہ 6 ضلعی چیمبرز آف کامرس بنانے کی تجویز، چیئرمین کمیٹی کی مخالفت

آج کا اخبار
اہم خبریں
21 اکتوبر ، 2025
اسلام آباد (نیوز ایجنسیاں) وزارت تجارت نے قومی اسمبلی کی قائمہ کمیٹی تجارت کو آگاہ کیا ہے کہ کراچی چیمبر آف کامرس کی جگہ 6ضلعی چیمبرز آف کامرس بنانے کی تجویز سامنے آئی ہے، وزارت تجارت کے حکام نے کمیٹی کو بتایا کہ ضلعی چیمبرز آف کامرس کے قیام سے کراچی چیمبرز آف کامرس کی حیثیت ختم ہوجائے گی، تجویز کو چیئرمین قائمہ کمیٹی نے مسترد کردیا۔ جاوید حنیف کی زیر صدارت قومی اسمبلی کی قائمہ کمیٹی برائے تجارت کا اہم اجلاس ہوا جس میں وزارت تجارت نے کراچی میں ضلعی چیمبرز آف کامرس کے قیام پر بریفنگ دی۔ وزارت تجارت نے قومی اسمبلی کی قائمہ کمیٹی تجارت کو آگاہ کیا کہ کراچی سٹی چیمبرز آف کامرس کے قیام کی سمری تیار کی گئی ہے، کراچی میں 6ضلعی چیمبرز آف کامرس کے قیام کی تجویز آئی ہے۔ وزارت تجارت کے حکام نے شرکا کو آگاہ کیا کہ ضلعی چیمبرز آف کامرس کے قیام سے کراچی چیمبرز آف کامرس کی حیثیت ختم ہو جائیگی جس پر چیئرمین کمیٹی جاوید حنیف نے کہا کہ کراچی چیمبرز آف کامرس کا نام بدلنا نہیں چاہئے۔حکام کا کہنا تھا کہ ایکٹ کے تحت بیک وقت دو چیمبرز آف کامرس کی رکنیت حاصل نہیں کی جاسکتی جس پر چیئرمین کمیٹی نے کہا کہ کراچی چیمبرز آف کامرس کی موجودہ حیثیت کو برقرار رکھا جائے۔ کراچی چیمبرز آف کامرس کو ٹریڈ ایکٹ سے استثنیٰ دینے کی سفارش کی گئی، کراچی میں ضلعی چیمبرز آف کامرس قائم کرنے کی منظوری دی جائے۔ کوئی ایسا بل منظور نہیں کیا جائیگا جس میں ضلعی چیمبرز کو ختم کرنیکی تجویز ہو۔
اہم خبریں سے مزید