فرمان الہی
نماز کے اوقات
کراچی (شکیل یامین کانگا/اسٹاف رپورٹر ) پاکستان فٹبال فیڈریشن کے صدر محسن گیلانی نے کہا ہے کہ پاکستانی فٹبال فٹبال کو گزشتہ دس سال میں آپس کی رنجشوں اور اختلاف نے بہت نقصان پہنچایا، معاملات بہتر کرنے کیلئے پی ایف ایف کا صدر بننے کے بعد سے فیفا، اے ایف سی اور پاکستان فٹ بال کمیونٹی سے رابطے میں ہوں، کوشش ہے کہ اس نقصان کا ازالہ ہوسکے۔ فیفا اور اے ایف سی نے بھرپور یقین دہانی کرائی ہے۔ ان خیالات کا اظہار انہوں نے نمائندہ جنگ سے حیدرآباد پریس کلب میں کیا۔ اس موقع پر پی ایف ایف کے سینئر نائب صدر حافظ ذکاء اللہ، سندھ فٹبال کے صدر حاجی اعظم خان، محمد عابد اور دیگر بھی موجود تھے۔ محسن گیلانی نے کہا کہ فٹ بال کا مستقبل انٹر اسکول ٹورنامنٹس سے جڑا ہوا ہے۔ اعظم خان کی درخواست پر انہوں نے سندھ میں ریجنل ٹورنامنٹس کے بعد نیشنل سطح کے ٹورنامنٹس کرانے کا اعلان کیا۔ انہوں نے کہا کہ فٹبال کیلئے معیاری گراؤنڈز کا ہونا بے حد ضروری ہے، اس وقت پاکستان میں عالمی معیار کا صرف ایک جناح فٹبال گراؤنڈ اسلام آباد میں موجود ہے۔
