فرمان الہی
نماز کے اوقات
کراچی( اسٹاف رپورٹر )پاکستان رینجرز اور سی ٹی ڈی پولیس نے شیر شاہ سے فتنہ الخوارج سے تعلق رکھنے والے انتہائی مطلوب ملزم محمد نور عرف خم ولد ولی خان کو گرفتار کرکے اسلحہ و ایمونیشن اور دھماکہ خیز مواد برآمد کرلیا ،دوران تفتیش ملزم نے اپنے دیگر ساتھیوں عابد مچھڑ، عمر خطاب محسود، قیوم محسود، اعظم خان، خان زمان، زاویل محسود، سید بادشاہ عرف ادرک، عبدالرحمان، عبدالحکیم، صدیق اللہ، خزن گل اور عابد چھوٹا کے ساتھ مل کر ٹارگٹ کلنگ، بھتہ وصولی بم دھماکوں، اغواء برائے تاوان اور متعدد پولیس مقابلوں میں شامل ہونے کا اعتراف کیا ہے،ترجمان رینجرز کے مطابق ملزم سال 2010 میں فتنہ الخوارج کے دہشت گرد قیوم محسود کے گروپ میں شامل ہوا اور 2012 میں عابد مچھڑ کی ٹارگٹ کلنگ ٹیم میں شامل رہا، ملزم کے اکثر ساتھی کراچی آپریشن کے دوران رینجرز اور پولیس مقابلوں میں مارے اور گرفتار ہو چکے ہیں، ملزم بھی 2015 میں کراچی آپریشن کے دوران گرفتاری سے بچنے کے لیے پنجاب اور خیبر پختونخواہ میں روپوش رہا۔ ملزم کے خلاف تھانہ منگھو پیر اور خواجہ اجمیر نگری میں متعدد ایف آئی آرز درج ہیں جس میں ملزم مفرور ہے۔ گرفتارملزم کو بمعہ اسلحہ و ایمونیشن اور دھماکہ خیز مواد مزید قانونی کارروائی کیلئے پولیس کے حوالے کر دیاگیا ہے۔
