کوئٹہ(اسٹاف رپورٹر)جمعیت علماء اسلام پاکستان کی مرکزی مجلس فقہی کے سربراہ مولانا مفتی محمد روزی خان نے بلوچستان اسمبلی سے 18 سال سے کم عمر کی شادی کے بل کی منظوری کو غیرشرعی ، غیرروایتی اور قبائلی اقدار کے منافی قرار دیتے ہوئے کہا ہے کہ یہ بل اسلامی شریعت کے مسلمہ اصولوں ، فقہی روایات اور پاکستانی معاشرتی ساخت سے مکمل طور پر متصادم ہے ۔ ایک بیان میں انہوں نے کہا ہے کہ اسلامی فقہ میں نکاح کی اہلیت عمر سے نہیں بلکہ جسمانی و ذہنی بلوغت اور سرپرست کی نگرانی سے مشروط ہے ، جسے آئینی طور پر بھی تسلیم کیا گیا ہے ۔ انہوں نے کہا کہ ایسے حساس مذہبی و سماجی مسئلے پر شریعت سے ہٹ کر قانون سازی کرنا نہ صرف سنگین غلطی بلکہ عوام کے دینی جذبات کو مجروح کرنے کے مترادف ہے ۔ انہوں نے کہا کہ این جی اوز کی خوشنودی اور فنڈز کے حصول کے لیے عجلت میں پاس کیا گیا یہ بل بلوچستان جیسے اسلامی ، قبائلی اور روایتی معاشرے پر بدنما داغ ہے ۔ انہوں نے کہا کہ عالم اسلام کے فقہی اداروں ، دارالافتاء اور شریعت کے ماہرین کی رائے کو نظر انداز کرنا قانون سازی کے عمل کو مشکوک بنا دیتا ہے ۔ انہوں نے مطالبہ کیا کہ صوبائی حکومت اس متنازع بل کو فوری طور پر واپس لے ، اسلامی نظریاتی کونسل اور معتبر دینی اداروں سے رہنمائی حاصل کرے اور شرعی اصولوں کے مطابق نئی مشاورت شروع کرے
فرمان الہی
نماز کے اوقات
