فرمان الہی
نماز کے اوقات
اسلام آباد ( نیوز رپورٹر ) صدرِ مملکت آصف علی زرداری سے شاہ عبداللہ دوم نے ایوانِ صدر میں ملاقات کی، دونوں رہنمائوں نے مشرقِ وسطیٰ کی صورتحال پر تبادلہ خیال کیا، اس موقع پر تقریب میں صدر زرداری نے شاہ عبداللہ دوم کو نشانِ پاکستان عطا کیا جبکہ شاہِ اردن نے صدر زرداری کو ’’وسامُ النّہضہ المرصّع‘‘ (آرڈر آف دی رینیسانس) سے نوازا، اس موقع پر وزیراعظم شہباز شریف فیلڈ مارشل سید عاصم منیر سمیت سول وعسکری قیادت بھی موجود تھی۔ تفصیلات کے مطابق صدرِ مملکت آصف علی زرداری سے شاہ عبداللہ دوم نے ایوانِ صدر میں ملاقات کی،ملاقات میں خاتونِ اوّل بی بی آصفہ بھٹو زرداری، چیئرمین پی پی پی بلاول بھٹو زرداری اور سینیٹر شیری رحمان شریک تھے۔صدر آصف علی زرداری نے پاکستان اور اردن کے دیرینہ، برادرانہ تعلقات کو مزید مضبوط بنانے کے عزم کا اعاد ہ کیا۔صدر آصف علی زرداری اور شاہ عبدالّلہ دوم نے دوطرفہ تعاون کو نئے شعبوں تک توسیع دینے پر اتفاق کیا۔صدر نے اردن کے ساتھ قریبی تعاون کے عزم کا اعادہ کیاصدر زرداری اور اردن کے فرماں روا کا مشرقِ وسطیٰ کی صورتِ حال پر تبادلہ خیال کیا گیا۔ خطے میں امن و استحکام کی مشترکہ حمایت کی گئی ۔صدر آصف علی زرداری اور شاہ عبدالّلہ دوم کا دو ریاستی حل کے تحت آزاد، خودمختار اور قابلِ عمل فلسطینی ریاست کے قیام پر زور دیاگیا۔ ڈپٹی وزیراعظم اور وزیرِ خارجہ سینیٹر محمد اسحاق دار، وفاقی وزیر برائے ماحولیاتی تبدیلی و ماحولیاتی رابطہ سینیٹر مصدق ملک، سیکرٹری وزارتِ خارجہ اور پاکستان اور اردن کے سفیران بھی تقریب میں موجود تھے۔صدر آصف علی زرداری نے شاہ عبدالّلہ دوم کو نشانِ پاکستان عطا کیا۔شاہِ اردن نے صدر آصف علی زرداری کو ’’وسامُ النّہضہ المرصّع‘‘ (آرڈر آف دی رینیسانس) سے نوازا، جو سربراہانِ مملکت اور معزز شخصیات کو دیا جاتا ہے۔ تقریب میں اعلیٰ سول و عسکری حکام بشمول وزیر اعظم محمد شہباز شریف، فیلڈ مارشل سید عاصم منیر، ائیر چیف مارشل ظہیر احمد بابر سدھو اور ایڈمرل نوید اشرف نے شرکت کی ۔وفاقی کابینہ کے ارکان اور سفرا بھی اس موقع پر موجود تھے۔
