فرمان الہی
نماز کے اوقات
کراچی (نیوز ڈیسک) ایران کی سپریم نیشنل سیکورٹی کونسل کے سیکریٹری علی لاریجانی کا کہنا ہے کہ ایران پاکستان سے گیس پائپ لائن معاہدے کی اپنی ذمے داریاں پوری کر چکا، سرحد تک لائن مکمل ہے، اگر رکاوٹیں نہ ہوتیں تو آج پاکستانی گھرانے ایرانی گیس استعمال کر رہے ہوتے، امید ہے کہ گیس پائپ لائن کے معاملے میں جلد حل نکل آئے گا۔اسلام آباد میں پریس کانفرنس کرتے ہوئے انہوں نے کہا کہ پاکستان اور افغانستان کے مسائل کے حل کے لئے ہر کردار ادا کرنے کو تیار ہیں، جب بھی پاکستان کہے گا تعاون کریں گے، پاکستان نے مشکل وقت میں ایران کا ساتھ دیا، پاکستانی قوم اور حکومت کے تعاون کو قدر کی نگاہ سے دیکھتے ہیں۔ڈاکٹر علی لاریجانی نے کہا کہ پاکستان اور افغانستان کے درمیان اختلافات ہمارے لیے تشویش کا باعث ہیں، جن کے حل کیلئے ہر راستہ اختیار کریں گے، فلسطین پر ایران کی تجویز واضح ہے۔ان کا کہنا ہے کہ فلسطینی عوام کو کھلے انتخابات کے ذریعے اپنا نظامِ حکومت خود منتخب کرنا چاہیے، امریکی تجاویز وقتی حل دیتی ہیں لیکن بڑے مسائل کو جنم دیتی ہیں۔ایران کی سپریم نیشنل سیکورٹی کونسل کے سیکریٹری نے کہا کہ بین الاقوامی امن فورس جیسے حل دیرپا نہیں ہوتے، یہ مزید مشکلات پیدا کر سکتے ہیں، پاکستان کا غزہ میں کسی فورس میں شمولیت کا فیصلہ خود پاکستان پر منحصر ہے۔
