فرمان الہی
نماز کے اوقات
کراچی(اسٹاف رپورٹر) میئر کراچی بیرسٹر مرتضیٰ وہاب نے کہا ہے کہ شہر ایک ہے تو اس کا نظام بھی ایک ہونا چاہئے ، اختیارات کو تقسیم کرنے کے بجائے یکجا کرنا چاہیے ،وفاقی حکومت کبھی نہیں چاہے گی کہ ان کے زیر انتظام علاقے میئر کے دائرہ اختیار میں آئیں، مگر اس کے باوجود وہ تمام اداروں کے ساتھ بیٹھ کر مسائل حل کرنے کی کوشش کر رہے ہیں، یہ سال کراچی کے لیے ترقی اور بہتری کا سال ہے،کے ایم سی کی جانب سے 30 ارب روپے شہر کے انفرااسٹرکچر کی بہتری پر خرچ کیے جا رہے ہیں، روزانہ تعصب اور نفرت پر مبنی پریس کانفرنسز کی سیاست کا قائل نہیں بلکہ شہر میں کام کر کے جواب دینے پر یقین رکھتا ہوں، اگر دیگر جماعتیں صحیح طرح سے عوامی خدمت کریں تو انہیں مداخلت کی ضرورت نہ پڑے، ان خیالات کا اظہار انہوں نے اولڈ سٹی ایریا میں محمد شاہ اسٹریٹ کی تعمیر و بحالی کے کام اور دیگر ترقیاتی منصوبوں کا افتتاح کرنے کے موقع پر کیا، اس مو قع پر سٹی کونسل میں ڈپٹی پارلیمانی لیڈر دل محمد، جمن دروان اور دیگر منتخب نمائندے بھی ان کے ہمراہ تھے، میئر نے کہا کہ ٹاؤنز کو 14 ارب روپے دیئے گئے ہیں جبکہ او زیڈ ٹی کی مد میں 27 ارب روپے موصول ہوئے ہیں اور کلک کے ذریعے 6 ارب روپے مزید ملے ہیں، پہلے ایک یوسی کو پانچ لاکھ روپے ملتے تھے جو اب بڑھا کر 12 لاکھ روپے کر دیے گئے ہیں، ٹاؤنز کے پاس روڈ کٹنگ کی مد میں 70 کروڑ روپے موجود ہیں، جنہیں عوامی بہتری کے لیے استعمال کیا جائے۔
