• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ہم نے دکھایا کراچی ایک عالمی ثقافتی دارالحکومت ہے، مراد علی شاہ

آج کا اخبار
اہم خبریں
08 دسمبر ، 2025
کراچی (اسٹاف رپورٹر) وزیراعلیٰ سندھ سید مراد علی شاہ نے کہا کہ کراچی میں 39 روزہ عالمی ثقافتی میلہ جس میں142 ممالک کے ایک ہزار سے زائد فنکاروں کی شرکت صوبے کےلئے ایک بہت بڑا اعزاز ہے ہم نے مل کر دنیا کو دکھایا کہ کراچی ایک عالمی ثقافتی دارالحکومت ہےبہترین میزبانی سندھ کی ثقافت کا قدیم ورثہ ہےیہ شاندار تقریب سندھ اور پاکستان کی بے مثال ثقافتی کامیابی کو ظاہر کرتا ہےیہ بات انہوں نے آرٹس کونسل آف پاکستان کراچی کی اختتامی تقریب سے خطاب کے دوران کہی انہوں نے کہا سندھی کلچر ڈے اور عالمی ثقافتی میلے نے اس تقریب کو ایک پُرجوش جشن میں تبدیل کردیا ہےوزیراعلیٰ سندھ نے بطور ِ مہمان خصوصی تقریب میں شرکت کی اور آرٹس کونسل آف پاکستان کراچی اور اس کے صدر محمد احمد شاہ کو مبارکباد دیتے ہوئے اسے پاکستان کے ثقافتی منظر نامے میں ایک تاریخی اور قابل ذکر کارنامہ قرار دیاوزیراعلیٰ نے اپنے خطاب میں کہا کہ کراچی نے 142 ممالک کے ایک ہزار سے زائد فنکاروں کا خیرمقدم کرتے ہوئے دنیا کے لئے اپنی باہیں کھول دی ہیں، یہ صرف ایک تقریب نہیں ہے بلکہ یہ ایک سنگ میل ہے جو سندھ کے امن، رواداری اور مہمان نوازی کے پائیدار جذبے کو اجاگر کرتا ہے انہوں نے کہا کہ جس دن سندھی کلچر ڈے منایا جا رہا ہےاسی دن ورلڈ کلچر فیسٹیول کا اختتام ایک خوشگوار اتفاق ہے، انہوں نے مزید کہا کہ سندھ کے ثقافتی دن اور عالمی آرٹ کے اتحاد نے اس دن کو سچ میں یادگار بنا دیا ہے اس دھرتی نے معروف شاعر، ادیب، مصور اور موسیقار پیدا کئے ہیں جو ایک طرح سے سندھ دھرتی کی ایک خوبصورت روایت کے طورپر چلی آرہی ہے ان میں شاہ عبداللطیف بھٹائی، شیخ ایاز، اے آر۔ ناگوری، مسرت مرزا، محمد جمن اور عابدہ پروین بطور آئیکن ہیں، جنہوں نےسرزمین کے امن اور محبت کے پیغام کوعام کیا انہوں نے کہا کہ سندھ نے ہمیشہ امن اور ہم آہنگی کی عالمی زبان بولی ہے اس فیسٹیول کی پرفارمنس امن و محبت کے پیغام کی بازگشت ہےوزیراعلیٰ نے آرٹس کونسل کی قیادت کو سراہتے ہوئے کہا کہ آرٹس کونسل نے وہ کرکے دکھایا جسے بہت سے لوگ ناممکن سمجھتے تھے 140 سے زائد ممالک سے فنکاروں کویکجا کرنا ایک مشکل کام ہے مگر احمد شاہ نے ثابت کر دیا کہ وژن اور عزم کے ساتھ کچھ بھی ناممکن نہیں ہےتقریب میں صوبائی وزراء، سفارتکاروں، سفیروں، قونصل جنرلز، اعلیٰ سرکاری افسران، فنکاروں، ثقافتی وفود اور میڈیا اراکین نے شرکت کی۔
اہم خبریں سے مزید