اسلام آباد (اے پی پی) وفاقی وزیرداخلہ محسن نقوی نے کہا ہے کہ اسلام آباد پاکستان کا پہلا کیپٹل سمارٹ سٹی بنے گا، کیپٹل اسمارٹ سٹی کے اسکوپ اور دائرہ کار کو پورے ملک تک بڑھایا جائیگا، یکم جنوری سے اسلام آباد میں بغیر ایم ٹیگ گاڑیوں کے داخلے پر پابندی ہوگی۔ وزیر داخلہ محسن نقوی اور وزیر مملکت طلال چوہدری نے سیف سٹی ہیڈکوارٹرز کا دورہ کیا ۔ اس موقع پر وفاقی وزیر داخلہ محسن نقوی نے ڈیجیٹل وال پر اسلام آباد شہر کی مانیٹرنگ کے نظام کا جائزہ لیا۔ وزیر داخلہ نے اسلام آباد سیف سٹی کو کیپٹل اسمارٹ سٹی بنانے کا جامع پلان طلب کر لیا۔ وزیرداخلہ محسن نقوی نے جدید ٹیکنالوجی کے ذریعے امن عامہ کے اقدامات کا مشاہدہ کیا۔اس موقع پر وزیر داخلہ کی زیر صدارت سیف سٹی ہیڈکوارٹرز میں اہم اجلاس منعقد ہوا جس میں وزیر داخلہ نے شہریوں کے جان ومال کے تحفظ کے اقدامات کا جائزہ لیا اور کیپٹل اسمارٹ سٹی پر کام تیز کرنے کی ہدایت کی۔ محسن نقوی نے کہا کہ کیپٹل اسمارٹ سٹی میں شہری سہولیات جیسے ریسکیو 1122، ٹریفک، سکیورٹی اور سی ڈی ایم اے کو مرکزی نظام میں ضم کیا جائیگا۔ اس موقع پر وفاقی سیکرٹری داخلہ، چیف کمشنر اسلام آباد، ایڈیشنل ڈپٹی کمشنر جنرل اور اعلی حکام بھی موجود تھے۔
فرمان الہی
نماز کے اوقات
