فرمان الہی
نماز کے اوقات
اسلام آباد(راناغلام قادر)وزیراعظم شہباز شریف اور سعودی ولی عہد شہزادہ محمد بن سلمان کے درمیان بدھ کی شام ٹیلیفونک رابطہ ‘ علاقائی صورتحال اور موجودہ پیشرفت پر تبادلہ خیال ‘برادرانہ تعلقات کو مزید مضبوط کرنے کے امرکا اعادہ ‘ وزیراعظم نے مختلف چیلنجز کے تناظر میں امت مسلمہ کے درمیان اتحاد اور ہم آہنگی برقرار رکھنے کی ضرورت پر زور دیتے ہوئے سعودی عرب کے ساتھ مکمل یکجہتی کا اظہارکیااور کہا کہ بات چیت اور سفارت کاری کے ذریعے علاقائی امن و استحکام کو برقرار رکھنا ناگزیر ہے‘ سعودی ولی عہد نے شہباز شریف کا شکریہ ادا کرتے ہوئے آئندہ برس پاکستان کا سرکاری دورہ کرنے کی خواہش کا اظہار کیا۔شہبازشریف سے پاکستان میں سعودی سفیر نواف بن سعید احمد المالکی نے بھی وزیراعظم ہاؤس میں ملاقات کی‘ سعودی سفیر نے شاہ سلمان بن عبدالعزیز اور شہزادہ محمد بن سلمان کی جانب سے وزیراعظم کو تہنیتی پیغام پہنچایا ۔ انہوں نے سعودی عرب کی پاکستان کے ساتھ باہمی دلچسپی کے تمام شعبوں میں تعاون بڑھانے کی خواہش کا اعادہ کیا۔تفصیلات کے مطابق شہباز شریف اور سعودی ولی عہد شہزادہ محمد بن سلمان کے درمیان بدھ کی شام ٹیلیفونک رابطہ ہواہے ‘وزیراعظم نے خادمِ حرمین شریفین شاہ سلمان بن عبدالعزیز اور شہزادہ محمد بن سلمان کے لیے اپنے احترام اور نیک تمناؤں کا اظہار کیا۔ وزیراعظم نے پاکستان کے لیے شہزادہ محمد بن سلمان کی محبت، خلوص اور گرمجوشی پر ان کا شکریہ ادا کیا۔ دونوں رہنماؤں نے اس امر کا اعادہ کیا کہ حالیہ مہینوں میں نئی بلندیوں کو چھونے والے دیرینہ اور برادرانہ تعلقات کو مزید مضبوط کیا جائے گا‘ سعودی ولی عہد نے ٹیلیفونک رابطے پر وزیراعظم کا شکریہ ادا کیا اور پاکستان کے ساتھ باہمی دلچسپی کے تمام شعبوں میں تعاون کو مزید فروغ دینے کی مملکت کی خواہش کا اعادہ کیا۔علاوہ ازیںشہبازشریف سے سعودی سفیر نواف بن سعید احمد المالکی نے بدھ کی شام وزیراعظم ہاؤس میں ملاقات کی‘پاک سعودیہ دوطرفہ تعلقات پر اطمینان کا اظہار کرتے ہوئے وزیراعظم نے دونوں ممالک کے درمیان دیرینہ برادرانہ تعلقات کو مزید گہرا کرنے کے اپنے مضبوط عزم اور عزم کا اعادہ کیا۔ اس حوالے سے انہوں نے ولی عہد شہزادہ محمد بن سلمان کا پاکستان کی حمایت پر شکریہ ادا کیا جس کی بدولت دونوں ممالک ایک دوسرے مزید قریب آئے۔شہباز شریف نے ضرورت کے وقت سعودی عرب کی جانب سے پاکستان کی مسلسل حمایت اور علاقائی امن و استحکام کے فروغ میں اس کے تعمیری کردار کو بھی سراہا۔ ملاقات میں حالیہ علاقائی اور عالمی پیش رفت پر بھی تبادلہء خیال کیا گیا۔ وزیراعظم نے مذاکرات اور سفارتکاری کے ذریعے امن و استحکام کو برقرار رکھنے کی ضرورت پر زور دیا۔
