فرمان الہی
نماز کے اوقات
اسلام آباد (نیوز ایجنسیاں) پاکستان نے بھارتی وزیرخارجہ جے شنکر کے غیر ذمہ دارانہ الزامات کو مسترد کرتے ہوئے کہا ہے کہ بھارت ایک بار پھر اپنی دہشت گردی اورعلاقائی عدم استحکام میں کردارسے توجہ ہٹانے کی کوشش کررہا ہے، دفتر خارجہ نے خطے میں دہشت گردی کے فروغ میں بھارت کا کردار دستاویزی اور واضح ہے، کلبھوشن یادیو کا معاملہ پاکستان کیخلاف ریاستی سرپرستی میں دہشت گردی کی واضح مثال ہے، سندھ طاس معاہدے کے تحت اپنے جائز حقوق کے تحفظ کیلئے تمام ضروری اقدامات کرینگے، پاکستان نے یمن کے صدارتی لیڈر شپ کونسل کی جانب سے تنازع کے حل کیلئے سعودی عرب میں جامع مذاکرات کے فیصلے کا خیرمقدم کرتے ہوئے پرامن ماحول میں آگے بڑھنے کی ضرورت پر زور دیا ہےاور یمن کے اتحاد اور علاقائی سلامتی کی مکمل حمایت کا اعادہ کیا ہے، نائب وزیراعظم و وزیرخارجہ اسحاق ڈار نے سعودی عرب اور متحدہ عرب امارات کے وزرائے خارجہ کو ٹیلی فون کرکے ان کے اقدام کو سراہا ہے۔تفصیلات کے مطابق ترجمان دفترخارجہ طاہر اندرابی کی جانب سے جاری بیان میں کہا گیا کہ پاکستان نے یمن کی صدارتی لیڈرشپ کونسل کی جانب سے ریاض میں جامع مذاکرات کا خیرمقدم کیا ہے اور ایک مرتبہ پر یمن کے تمام فریقین پر زور دیا ہے کہ متفقہ اصولوں پر مذاکراتی سیاسی حل کی بنیاد پر آگے بڑھنے کیلئے کوششیں کریں۔ دفتر خارجہ نے کہا کہ اتحاد اور برادرانہ اصولوں کے تحت پاکستان کو توقع ہے کہ علاقائی کوششیں یمن کے پائیدار امن اور استحکام کو بحال کرنے میں معاون ہونگی۔ دوسری جانب نائب وزیراعظم اور وزیرخارجہ اسحاق ڈار نے بیجنگ پہنچنے کے بعد سعودی عرب کے وزیر خارجہ فیصل بن فرحان اور متحدہ عرب امارات کے وزیر خارجہ سے ٹیلی فونک گفتگو کی اور دونوں رہنماؤں نے خطے کی تازہ صورتحال پر تفصیلی تبادلہ خیال کیا۔ ترجمان دفتر خارجہ کے مطابق نائب وزیراعظم اور وزیر خارجہ نے یمن سے متعلق سعودی وزارتِ خارجہ کے بیان کا خیر مقدم کیا اور خطے میں صورتحال کو خوش اسلوبی سے حل کرنے کیلئے تمام فریقین کی کوششوں کو سراہا۔ اسحاق ڈار نے بیجنگ سے متحدہ عرب امارات کے نائب وزیراعظم و وزیر خارجہ شیخ عبداللہ بن زاید النہیان سے ٹیلی فونک رابطہ کیا اور دونوں رہنماؤں نے موجودہ علاقائی صورتحال پر تبادلہ خیال کیا۔ دونوں رہنماؤں نے خطے میں مثبت پیش رفت اور بہتری کے رجحان پر اطمینان کا اظہار کیا۔ نائب وزیراعظم و وزیر خارجہ نے اس امر کو سراہا کہ مکالمے اور سفارت کاری کے ذریعے زمینی حقائق میں ٹھوس اور مثبت نتائج سامنے آ رہے ہیں۔ دفتر خارجہ نے بھارتی وزیر خارجہ جے شنکر کی جانب سے پاکستان کو برا ہمسائیہ قرار دینے پر سخت ردعمل دیتے ہوئے بھارتی الزامات مسترد کر دیئے۔
