فرمان الہی
نماز کے اوقات
کراچی (اسٹاف رپورٹر) پاکستان مسلم لیگ فنکشنل سندھ کے سیکریٹری جنرل سردار عبدالرحیم نے گل پلازہ میں آتشزدگی کے افسوسناک واقعے پر گہرے دکھ اور افسوس کا اظہار کرتے ہوئے کہا ہے کہ گل پلازہ میں آتشزدگی انتظامیہ کی ناہلی کا واضح ثبوت ہے ۔سندھ حکومت فوری طور پر غفلت کے مرتکب ذمہ داران کے خلاف سخت کارروائی کرے۔سردار عبدالرحیم نے کہا کہ وہ متاثرہ تاجروں ، ملازمین اور ان کے اہلِ خانہ کے غم میں برابر کے شریک ہیں۔ فائر بریگیڈ کی بروقت رسپانس نہ ہونا اور تاخیر سے موقع پر پہنچنا آگ کے پھیلاؤ کی بنیادی وجہ بنا ، جو کہ انتظامیہ کی سنگین غفلت اور نااہلی کا واضح ثبوت ہے ۔میڈیا کو جاری بیان میں ان کا کہنا تھا کہ یہ انتہائی تشویشناک امر ہے کہ آگ لگنے کے کئی گھنٹے گزرنے کے باوجود شعلوں پر مکمل طور پر قابو نہیں پایا جا سکا، جس کے باعث قیمتی جانیں ضائع ہوئیں اور کروڑوں روپے کا مالی نقصان ہوا۔ سندھ حکومت ہنگامی حالات سے نمٹنے میں ناکام ثابت ہوئی ہے۔ سردار عبدالرحیم نے کہا کہ گھنٹوں تک آگ پر قابو نہ پانا اور اعلیٰ شہری انتظامیہ کی عدم موجودگی عوامی اعتماد کو مجروح کر رہی ہے۔ ان کا کہنا تھا کہ میئر کراچی اور متعلقہ حکام کا بروقت جائے حادثہ پر نہ پہنچنا انتہائی افسوسناک اور غیر ذمہ دارانہ طرزِ عمل ہے۔انہوں نے مطالبہ کیا کہ سندھ حکومت فوری طور پر فائر ڈیپارٹمنٹ کی ناکامیوں کا تفصیلی جائزہ لے، غفلت کے مرتکب ذمہ داران کے خلاف سخت کارروائی کرے اور مستقبل میں ایسے سانحات سے بچاؤ کے لیے عملی اقدامات اٹھائے۔
