فرمان الہی
نماز کے اوقات
اسلام آباد (مہتاب حیدر)مالی سال 26-2025 میں حکومت سرمایہ کاری کے ہدف میں ناکام،جی ڈی پی شرح نمو 3.7 فیصد تک محدود؛ قومی بچتیں 14.4 فیصد کے مقررہ ہدف کے مطابق رہیں۔ تفصیلات کے مطابق پاکستان میں جی ڈی پی کے تناسب سے سرمایہ کاری اور بچتیں سبکدوش ہونے والے مالی سال 26-2025 میں اعلیٰ شرح نمو کو تحریک دینے میں ناکام رہی ہیں۔ سبکدوش ہونے والے مالی سال کے لیے جی ڈی پی کی شرح نمو 3.7 فیصد رہی۔ حکومت جی ڈی پی کے تناسب سے سرمایہ کاری کے تصور شدہ ہدف کو حاصل کرنے میں ناکام رہی ہے، کیونکہ 26-2025 میں یہ جی ڈی پی کے 14.4 فیصد پر رہی جبکہ مطلوبہ ہدف 14.7 فیصد تھا۔ قومی بچتیں مقررہ ہدف کے مطابق جی ڈی پی کے 14.4 0 فیصد پر رہیں۔ تاہم، سرمایہ کاری کے بعض اعداد و شمار، خاص طور پر تعمیراتی شعبے میں نجی شعبے کی جانب سے کی گئی سرمایہ کاری نے کئی سوالات پیدا کر دیے ہیں کیونکہ اس سرمایہ کاری میں 60 فیصد کا بڑا اضافہ ہوا ہے۔ مجموعی طور پر، گزشتہ دو سالوں میں نجی شعبے کی سرمایہ کاری میں 110 فیصد اضافہ ہوا ہے جو کہ زمینی حقائق کے بالکل برعکس معلوم ہوتا ہے۔ بہت زیادہ تشہیر پانے والی اسپیشل انویسٹمنٹ فیسیلیٹیشن کونسل (ایس آئی ایف سی) کے قیام کے باوجود، حکومت غیر ملکی سرمایہ کاری کو راغب کرنے میں ناکام رہی، کیونکہ جی ڈی پی کے تناسب سے کل سرمایہ کاری مالی سال 25-2024 اور 26-2025 میں 14.4 فیصد پر غیر تبدیل شدہ رہی۔
