کراچی( اسٹاف رپورٹر) جامعہ کراچی کے ایریا اسٹیڈی سینٹر فار یورپ میں ساڑھے چھ برس بعد ڈائریکٹر کا تقرر کردیا گیا ہے ۔ وائس چانسلر ڈاکٹر خالد عراقی کی ہدایت پر پروفیسر ڈاکٹر عظمی شجاعت کو ڈائریکٹر مقرر کرنے کا نوٹی فیکشن جاری کردیا گیا ہے۔ ڈاکٹر عظمی شجاعت نے ڈین آف سوشل سائنسز اور آرٹس ڈاکٹر نصرت ادریس سے عہدے کا چارج لیا۔ ساڑھے 6 برس سے پروفیسر نہ ہونے کے باعث ایریا اسٹیڈی سینٹر فار یورپ کے عہدے کا چارج ڈین کے پاس تھا۔ایریا اسٹڈی سینٹر فار یوروپ 1974 میں ایک ایکٹ آف پارلیمنٹ کے ذریعے جامعہ کراچی اور پاکستان کی دیگر پانچ بڑی جامعات میں ساتھ قائم کیا گیا تھا۔ اس کے قیام کا مقصد M.S/Ph.D کی سطح پر تحقیق کرنا ہے۔ یہ سینٹر عصری یورپی مسائل اور متعلقہ موضوعات پر مضامین کے ساتھ دو سالانہ جرنل آف یورپین اسٹڈیز بھی شائع کرتا ہے۔ اور اب اپنی تحقیق کو یورپی یونین، اس کی سیاست، قانون، مسابقت کی پالیسی، اقتصادیات اور بیرونی تعلقات پر مرکوز کر رہا ہے۔ یورپی سلامتی، مشترکہ خارجہ اور سلامتی کی پالیسی، یورپ پاکستان تعلقات، یورپ اور مسلم دنیا اور ترقی پذیر دنیا کے ساتھ یورپ کے تعلقات بھی سینٹر میں تحقیق اور تدریس کے مضامین میں شامل ہیں۔ چونکہ ایریا اسٹڈی سینٹرز کے قیام کا ایک مقصد ملک میں پالیسی سازوں کو فیڈ بیک فراہم کرنا تھا، اس لیے سینٹر کو دفتر خارجہ اور حکومت پاکستان کے دیگر اداروں سے تحقیقی تجاویز اور اسائنمنٹس بھی موصول ہوتے ہیں۔ یہ مرکز سرٹیفکیٹ کی سطح پر فرانسیسی، جرمن، اطالوی اور انگریزی زبانوں میں کورسز اور فرانسیسی زبان میں ڈپلومہ کراتاہے۔