فرمان الہی
نماز کے اوقات
کراچی (اسٹاف رپورٹر)17سال بعد انگلش کرکٹ ٹیم کی پاکستان میں ٹیسٹ سیریز کا اعلان کردیا گیا، ٹیسٹ سیریز کی گرماگرمی دسمبر کی سردیوں کی شدت کم کرے گی۔ انگلش کرکٹ ٹیم دسمبر میں پنڈی، ملتان اور کراچی میں پاکستان کے خلاف تین ٹیسٹ میچ کھیلے گی۔ اس سے قبل ٹیم ابوظبی میں ایک ہفتے کے ٹریننگ کیمپ میں شرکت کرے گی۔ پیر کو پاکستان کرکٹ بورڈ نے اعلان کیا ہے کہ سیریز کا پہلا میچ یکم سے پانچ دسمبر تک راولپنڈی میں کھیلا جائے گا۔ بقیہ دو میچز 9اور 17دسمبر کو بالترتیب ملتان اور کراچی میں شروع ہوں گے انگلینڈ کی ٹیم پہلی بار راولپنڈی میں کوئی ٹیسٹ میچ کھیلے گی۔ پاکستان اس وینیو پر 12میچز کی میزبانی کرچکا ہے، جس میں سے 5میں فتح اور 3میں شکست کا سامنا کرنا پڑا ہے۔ آخری مرتبہ 2005 میں پاکستان کا دورہ کرنے والی انگلش ٹیم کو ملتان میں کھیلے گئے ٹیسٹ میچ میں 22رنز سے شکست ہوئی تھی۔ اس وینیو پر اب تک کھیلے گئے پانچ ٹیسٹ میچز میں سے پاکستان نے تین میں کامیابی اور ایک میں ناکامی کا سامنا کیا ہے۔ دونوں ٹیموں کے مابین ٹیسٹ سیریز کا آخری میچ کراچی میں کھیلا جائے گا جہاں سال 2000میں مہمان ٹیم نے ناصر حسین کی زیرقیادت کامیابی حاصل کرکے نیشنل اسٹیڈیم میں پاکستان کی مسلسل 34فتوحات کا سلسلہ توڑا تھا۔ اس مقام پر اب تک پاکستان کو 23ٹیسٹ میچز میں کامیابی اور صرف 2 میں شکست کا سامنا کرنا پڑا ہے۔ ڈائریکٹر انٹرنیشنل کرکٹ پی سی بی ذاکر خان کا کہنا ہے کہ انہیں انگلینڈکے ٹیسٹ اسکواڈ کی ایک مرتبہ پھر پاکستان میں میزبانی کرنے پر بہت خوشی ہوگی۔ قائم مقام چیف ایگزیکٹیو ای سی بی کلیئر کانر کا کہنا ہے کہ 2005کے بعد انگلینڈ ٹیسٹ اسکواڈ کی پاکستان روانگی ایک تاریخی لمحہ ہے۔ ایک طویل عرصہ بعد کرکٹ سے محبت کرنیوالے پرجوش شائقین کرکٹ کے سامنے کھیلنے کا موقع ملنے اور و ہ اس سیریز کے شیڈول کا اعلان کرنے پر بہت پرجوش ہیں۔ دونوں ٹیموں کے مابین تین ٹیسٹ میچز کی یہ سیریز آئی سی سی ورلڈ ٹیسٹ چیمپئن شپ کا حصہ ہے۔ چیمپئن شپ میں انگلینڈ کی ٹیم ساتویں اور پاکستان پانچویں نمبرپر موجود ہے۔
