• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

جے شنکر کو مہمان نوازی نہیں آتی، بلاول کو تیاری سے جانا تھا، عمران

آج کا اخبار
اہم خبریں
07 مئی ، 2023
لاہور، ملتان ( ایجنسیاں، جنگ نیوز) پاکستان تحریک انصاف (پی ٹی آئی) کے چیئرمین عمران خان نے کہا ہے کہ جے شنکر کو مہمان نوازی نہیں آتی، لکشمی چوک پر پی ٹی آئی کی ریلی سے خطاب کرتے ہوئے عمران خان نے کہا کہ بلاول کو شنگھائی اجلاس میں پوری تیاری کے ساتھ جانا چاہیے تھا انہوں نے جانے سے پہلے کسی سے پوچھا،شہبازشریف عوام کو مہنگائی کے سیلاب میں چھوڑ کربرطانیہ کیالینے گئے۔دریں اثنا سابق وزیر خارجہ اور پی ٹی آئی کے مرکزی رہنما شاہ محمود قریشی نے ملتان میں صحافیوں سے گفتگو کرتے ہوئے کہا کہ میرے بلاول سے لاکھ اختلافات ہوں لیکن ہمارے وزیر خارجہ نے اچھا پیغام دیا ہے۔ بھارت کے وزیر خارجہ نے جو بیان دیا وہ ان کو زیب نہیں دیتا، میزبانی کے آداب ہوتے ہیں جو بھارت نے نہیں اپنائے۔لاہور میں ریلی کے شرکا سے خطاب کرتے ہوئے عمران خان نےمزید کہا کہ بھارت جانے سے پہلے بلاول نے کسی سے پوچھا؟ جے شنکر نے جس طرح زبان استعمال کی اس سے اندازہ ہوگیا کہ اُسے مہمان نوازی کے آداب نہیں آتے کیونکہ مہمان کے ساتھ ایسا سلوک نہیں کرتے۔عمران خان نے برطانوی شہزاد سوئم کی تاج پوشی میں وزیر اعظم کی شرکت پر سوال کرتے ہوئے کہا کہ شہباز شریف عوام کو مہنگائی کے سیلاب میں چھوڑ کر برطانوی کیا لینے گئے اور کس طرح چلے گئے، ان کا علاج، کاروبار اور بچے سب کچھ باہر ہے اور انہیں پاکستان کے عوام سے کوئی پروا نہیں ہے۔
اہم خبریں سے مزید