• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

گلگت بلتستان کے سرکاری اسکولوں میں انرولمنٹ میں اضافہ

آج کا اخبار
اہم خبریں
09 مئی ، 2023
اسلام آباد (قاسم عباسی) گلگت بلتستان بھر کے اسکولوں میں صرف دو ماہ کے دوران کل 26266طلباء نے داخلہ لیا ہے جو پچھلے سال کے پورے انرولمنٹ کے مقابلے میں13فیصد زیادہ ہے۔ چیف سیکرٹری گلگت بلتستان محی الدین وانی کی جانب سے دی نیوز کے ساتھ شیئر کیے گئے سرکاری اعداد و شمار سے یہ بات سامنے آئی ہے کہ جی بی کے تمام اضلاع میں غذر اور کھرمنگ اضلاع میں اس سال اضافی طلباء کا سب سے زیادہ داخلہ دیکھنے میں آیا۔ اعداد و شمار سے انکشاف ہوا کہ ان دونوں اضلاع میں اسکولوں میں طلباء کے داخلے میں پچھلے سال کے مقابلے میں 22 فیصد سے زیادہ اضافہ ہوا۔ اس نامہ نگار سے گفتگو کرتے ہوئے محی الدین وانی نے کہا کہ یہ کامیابی جی بی میں تمام طلباء کے لیے معیاری تعلیم فراہم کرنے کے لیے حکومت کے عزم کا ثبوت ہے۔ حکومت تعلیم کے شعبے میں بہت زیادہ سرمایہ کاری کر رہی ہے، ٹیکنالوجی کی سہولیات فراہم کر رہی ہے، انفرا اسٹرکچر کو بہتر بنانے پر توجہ مرکوز کر رہی ہے، زیادہ قابل اساتذہ کی خدمات حاصل کر رہی ہے اور سیکھنے کے تجربے کو بڑھانے کے لیے جدید تدریسی طریقے متعارف کروا رہی ہے۔ 2022 میں گلگت میں پورے سال میں کل 29222 طلباء نے داخلہ لیا جبکہ رواں سال صرف دو ماہ میں کل داخلہ لینے والے طلباء کی تعداد بڑھ کر 33031 ہوگئی۔ غذر میں گزشتہ سال کل 21374 طلبہ تھے جو اس سال 22 فیصد اضافے سے 26180 ہو گئے ہیں۔ ہنزہ میں 2022 میں 4071 طلباء نے داخلہ لیا تھا جبکہ گزشتہ دو ماہ میں یہ تعداد 11 فیصد اضافے کے ساتھ 4523 ہو گئی ہے۔ نگر اور اسکردو میں 2022 میں 8413 اور 35923 طلباء نے داخلہ لیا تھا۔ تاہم اب ان اضلاع میں چار اور گیارہ فیصد اضافے کے ساتھ یہ تعداد بالترتیب 8715 اور 39728 ہو گئی ہے۔ پچھلے سال گھانچے میں تمام اسکولوں میں کل 22801 طلباء نے داخلہ لیا تھا۔ صرف پچھلے دو ماہ میں ان کی تعداد آٹھ فیصد بڑھ کر اب 24573 ہوگئی ہے۔
اہم خبریں سے مزید