فرمان الہی
نماز کے اوقات
اسلام آ باد ( نمائندہ جنگ ) صدر مملکت آ صف علی زرداری اور وزیر اعظم نےشہباز شریف نے عید الاضحی کے موقع پر پیغامات میں پاکستانی قوم اور عالم اسلام کو مبارکباد پیش کی ہے۔ انہو ں نے کہا کہ معاشی طور پر کمزور افرا د کو بھی عید کی خوشیوں میں شامل کیا جائے ،صدر مملکت نے کہا کہ ہمیں قربانی کی اصل روح کو سمجھ کر اپنی عملی زندگی میں ایثار و قربانی کا مظاہر کرنا چاہیے جبکہ وزیراعظم نے کہا کہ فلسطین اور کشمیر کے مسلمانوں کی قربانی کو بھی یاد رکھنا چاہیے جو ظلم و ستم کے سامنے ڈٹ کر کھڑے ہیں۔صدر مملکت نے کہا کہ قوم اللہ تعالی کے حضور دعا گو ہوں کہ یہ بابرکت موقع پورے عالم اسلام اورپاکستان کیلئے رحمتیں اور خوشیاں لائے،عیدالاضحیٰ میں ہمارے لیے یہ درس ہے کہ آزمائش اور امتحان کی صورتحال میں ثابت قدم رہنا اور اللہ تعالیٰ کی اطاعت اور فرمانبرداری ہی کامیابی کی کنجی ہے ۔ انہوں نے کہا کہ عید الاضحیٰ کے اس موقع پر پوری پاکستانی قوم کو اس عزم کا اعادہ کرنا چاہیے کہ ہم اخوت،ایثار،محبت اور اخلاص سے سرشار ہو کر اپنے ارد گرد ضرورت مند لوگوں کی مدد کرینگے ۔ ادھروزیر اعظم شہباز شریف نے اپنے پیغام میں عید الاضحیٰ اور عظیم اسلامی عبادت حج بیت اللہ کے موقع پر پوری پاکستانی قوم اور عالم اسلام کو مبارکباد دی ہے ۔ انہوں نے کہا کہ دعا کرتا ہوں کہ اللہ تعالی پاکستانی قوم اور پوری ملت اسلامیہ کی عبادات اور قربانیاں قبول فرمائے۔ انہوں نے کہا کہ قربانی کا جذ بہ ایک ایسا عمل ہے جس کا مقصد انسان کا اپنی نفسانی خواہشات کو اعلیٰ مقاصد کے حصول کے لیے قربان کرنا ہے۔ عید الاضحیٰ کے با برکت موقع پر ہمیں اپنے ان بہن بھائیوں کا بھی خیال رکھنا ہے جو قربانی کرنے کی استطاعت نہیں رکھتے تاکہ ہمارے ایسے ہم وطن بہن بھائی جو معاشی طور پر کمزور ہیں وہ بھی ان خوشیوں کو بھرپور طریقے سے منا سکیں۔ آج کے دن ہمیں فلسطین اور بھارتی غیر قانونی مقبوضہ جموں و کشمیر کے مظلوم مسلمانوں کی عظیم قربانی کو بھی یاد رکھنا ہے جو کہ ظلم و ستم اور بربریت کے سامنے آہنی دیوار کی مانند ڈٹ کر کھڑے ہیں۔ میری اللہ تعالی سے دعا ہے کہ ہم سب کو عید الاضحیٰ کی حقیقی خوشیوں سے ہم کنار فرمائے اور جذبہ ایثار و قربانی پر اس کی روح کے مطابق عمل کرنے کی توفیق عطا فرمائے۔
